Sybailas jemqorlyqqa qarsy qyzmet Astana qalasynyń prokýratýrasymen birlesip, zańnamada kózdelgen alymdar men tólemderdi tólemei, shetelden ákelingen avtokólikterdi tirkeý esebine zańsyz qoiýmen ainalysatyn «Azamattarǵa arnalǵan úkimet» KEAQ qyzmetkerleri men azamattyq tulǵalardan turatyn uiymdasqan qylmystyq toptyń quqyqqa qarsy qyzmetiniń jolyn kesti, - dep habarlaidy "Ult aqparat" Antikor baspasóz qyzmetine silteme jasap.
Vedomstvo málimetinshe, qylmystyq top osy jyldyń qańtar aiynan bastap azamattardy sheteldik kólikterdi esepke qoiýdyń zańdylyǵyna qatysty aldaý arqyly óz qyzmetterin usynyp, olardyń aqshalai qarajatyn urlap, 486 kólikti zańsyz tirkegeni anyqtaldy. Árbir kólik úshin zańsyz qyzmettiń quny 400 myń teńgeden 1,6 mln teńgege deiin bolǵan.
"Qajet aqshany alǵannan keiin kúdiktiler kólikterdi satyp alý-satý mámileleriniń jazbasha formasyn, memlekettik nómirler men kólik quraldaryn tirkeý týraly kýálikterdi daiyndaǵany úshin memlekettik baj tólengeni týraly túbirtekterdi qoldan jasaǵan", - delingen habarlamada.
UQT qyzmeti, onyń ishinde ishki ister organdarynyń memlekettik avtoinspektorlarynyń "Web-modýl" servis ortalyǵy" aqparattyq júiesinde buryn kádege jaratylǵan kólikter týraly málimetterdi qasaqana zańsyz joiýy jáne olardyń ornyna jańadan ákelingen kólikterdiń málimetterin engizý arqyly júzege asyrylǵan.
Sot sanktsiiasymen tórt politsiia qyzmetkeri qamaýǵa alyndy.
"Memlekettik bajdar men tólemderdi tóleýge arnalǵan azamattardyń aqshalai qarajatyn kúdiktiler urlap, jeke qajettilikterine jumsady. Osy adamdardyń qylmystyq áreketi nátijesinde azamattar men memleketke 1 milliard teńgege tólenbegen memlekettik bajdar men alymdar túrinde zalal keltirildi", - delingen vedomstvo málimetinde.
Osy is boiynsha qylmystyq toptyń taǵy 4 belsendi qatysýshysy, onyń ishinde Astana qalasy boiynsha №2 mamandandyrylǵan HQKO basshysy ustalǵan. Tergeý jalǵasyp jatyr.
