Elimizde salyq raqymshylyǵy bastalǵaly bul jeńildikti 44 397 salyq tóleýshi paidalanǵan. Bul týraly Ortalyq kommýnikatsiialar qyzmetinde QR Qarjy ministrliginiń birinshi vitse-ministri Berik Sholpanqulov málim etti, dep habarlaidy QazAqparat.
«Barlyǵyńyz biletindei, 2019 jyldyń 1 qańtarynan bastap salyq tóleýshi negizgi qaryzdyń somasyn tólegen jaǵdaida eseptelgen ósimpuldar men aiyppuldardy esepten shyǵarý arqyly shaǵyn jáne orta biznes sýbektilerine salyqtyq raqymshylyq júrgizý tapsyrylǵan bolatyn. Qarjy ministrligi zańnamaǵa túzetýler engizip, tiisti ishki normativtik quqyqtyq aktiler ázirlep, sonyń negizinde byltyr shaǵyn jáne orta biznes sýbektileri úshin, sondai-aq jeke tulǵalar úshin salyqtyq raqymshylyq jasaldy. 2018 jyldyń 1 qazanyndaǵy jaǵdai boiynsha bereshegi bar salyq tóleýshiler raqymshylyq naýqanyna iligip, óteý kezinde eseptelgen ósimpuldar men aiyppuldar esepten shyǵaryldy. Salyqtyq raqymshylyq qorytyndysy boiynsha, jalpy respýblika deńgeiinde 41 183 salyq tóleýshi 8,3 mlrd teńge somasynda bereshegin ótedi. Bul rette esepten shyǵarylǵan ósimaqylar men aiyppul somasy 2,9 mlrd teńgeni qurady», - dep atap ótti Qarjy ministriniń birinshi orynbasary.
Berik Sholpanqulovtyń aitýynsha, 2018 jyldyń 1 qazanyndaǵy jaǵdai boiynsha salyqtyq tekserýlerdiń nátijeleri týraly habarlamaǵa shaǵym jasaýǵa bailanysty bereshegi anyqtalmaǵan salyq tóleýshiler de raqymshylyqqa ilingen.
«Byltyr tamyz aiynan bastap salyq zańnamasyn buzǵan, alaida ony óz betinshe joiǵan jáne 2018 jyldyń 1 qazanyna deiin tóleý merzimimen ótken salyq kezeńderi úshin qosymsha salyq eseptiligin usynǵan salyq tóleýshilerge de raqymshylyq jasaldy. Nátijesinde 3 214 salyq tóleýshi raqymshylyqty paidalanyp, olar 10,1 mlrd teńge bereshekti tólegen. Olardyń 3,6 mlrd teńge kólemindegi aiyppuldary men ósimaqylary esepten shyǵaryldy. Osylaisha, salyqtyq raqymshylyqty qoldanǵan salyq tóleýshilerdiń jalpy sany 44 397 qurady. Tólengen bereshek 18,4 mlrd teńgeni, al esepten shyǵarylǵan ósimaqylar men aiyppuldar 6,5 mlrd teńgeni kórsetti», - dep túiindedi Berik Sholpanqulov.
