QR Eńbek jáne halyqty áleýmettik qorǵaý ministri Birjan Nurymbetov 42500 teńge járdemaqy beriletin sanattardy jariialady, dep habarlaidy QazAqparat.
«Erteńnen bastap shilde aiyna 42500 teńge tóleý jóninde ótinim qabyldaýdy bastaimyz. Mundaǵy jalpy negizgi qaǵidat – bul tólem jumys istep júrgen jáne karantinniń kúsheitilgen sharalaryna qatysty tabysynan aiyrylǵandarǵa tólenedi. Birinshiden, bul járdemaqy karantindik shekteýlerge qatysty aqysyz demalysqa jiberilgen jaldamaly jumyskerlerge beriledi. Bul jerde ótinishti tek jumys berýshi jiberedi. Jumys berýshilerge qoiylatyn bir ǵana shart – olardyń jumysy karantinde toqtap qalsa ǵana beriledi. Ony jergilikti aýdan, qala boiynsha shtattar, Atameken UKP óńirlik ókilderi tekseredi. Sebebi, qazirgi shekteý sharalary jeńildeý bolǵanymen, ár óńirde bas sanitarlyq dárigerler óz shekteýlerin qoiyp jatyr», - dedi ministr Ortalyq kommýnikatsiialar qyzmetinde ótken brifingte.
Ekinshiden, karantinde jumysy toqtap qalǵan jeke kásipkerler, jeke praktikamen ainalysatyndarǵa 42500 teńge tólenedi. Ony da aýdan, qaladaǵy shtab pen salyq komitetiniń ókilderi belgileitin bolady.
«Úshinshiden, azamattyq-quqyqtyq sipattaǵy kelisim boiynsha jumys istep júrgen frilanserden ótinishti ózderi beredi. Bul ótinishter shtab arqyly ótpeidi, tikelei jiberiledi. Bul kisilerge bir shart – osy 2020 jyly 6 aidyń ishinde bir ret bolsa da zeinetaqy jarnalarynyń aýdarylýy. Bul qatarǵa kásipkerlikpen ai saiyn turaqty túrde biryńǵai jiyntyq tólem (BJT) tólep júrgen kásipkerler de kiredi. Sońǵy sanat – óz betinshe jumys istep júrgenderge 42500 teńgeni alýǵa bolady. Bul jolǵy ózgeris – ótkendegidei BJT tóleýdiń qajeti joq, tótenshe jaǵdai kezinde tóledińizder, biz sony eskeremiz», - dedi ministr.
