Eńbek jáne halyqty áleýmettik qorǵaý ministri Birjan Nurymbetov elimizde 42 500 teńgelik tólemdi alý úshin eshqandai qujattyń qajeti joq ekenin aitty, dep habarlaidy QazAqparat.
«Biz jumys berýshilerdi jumys oryndaryn, jumysshylardyń jalaqysyn saqtaýǵa, qashyqtan jumys isteýge múmkindik berýge jáne aqyly eńbek demalysqa jiberýge shaqyrǵan bolatynbyz. Biraq ókinishke qarai, kópshilik mekeme, ásirese orta jáne shaǵyn biznes ókilderiniń bul talaptardy oryndaýǵa múmkindigi bolmai otyr. Olar jumysshylaryn aqysyz demalysqa jiberýge, tipti qysqartýǵa májbúr. Onyń ústine elimizde óz betinshe jumys istep júrgen azamattar da tabysynan aiyrylýda. Elimizde statistika boiynsha ózin ózi jumyspen qamtyǵan 2 mln adam bar. Osyǵan bailanysty Prezidenttiń 23 naýryzdaǵy tapsyrmasyna sáikes tótenshe jaǵdaida Memlekettik saqtandyrý qorynan tabysynan aiyrylǵan azamattarǵa 42500 teńge áleýmettik tólem engizildi. Alǵashqy 1 myńnan astam adam ony ala bastady», - dedi Birjan Nurymbetov OKQ-da ótken baspasóz máslihatynda.
Ministrdiń aitýynsha Memleket basshysy osy áleýmettik tólemdi alý máselesin jeńildetýdi tapsyrǵan.
«Osyǵan balianysty tártipti ózgertýdemiz. Sonymen búgin Memlekettik saqtandyrý qorynan 42500 teńgeni kim alady? Ol birinshiden jaldamaly qyzmetkerler – orta jáne shaǵyn kásiporyndarda aqysyz demalysqa jiberilgen jumysshylar. Karantin jariialanǵan qalalarda bul sanatqa iri kásiporyndarda jatady. Ekinshisi – jeke tulǵalar, óz betinshe jumyspen qamtylǵandar. Olardyń ishinde jeke kásipkerler bar - 1,5 mln azamat. Jeke praktikamen ainalysyp júrgen (jeke advokattar, sot oryndaýshylar, notariýstar) 2 myńnan astam osyndai azamat bar. Frilanserden de 180 myń bar. Olar da tabystarynan aiyrylýda. Sońǵy 12 aida Biryńǵai jiyntyq kólemin tólegen 316 myń adam bar», - dedi ol.
Áleýmettik tólemdi alý úshin azamattarymyz ne isteýi kerek? Qaida jáne qandai qujat tapsyrý kerek?
«Birinshiden endi eshqandai qujatty tapsyrýdyń qajeti joq. Tek ótinish beriledi. Jumys berýshi óziniń ótinishinde jumysshylarynyń tizimin qosady. Bul jerde tabystan aiyrylǵannyń tótenshe jaǵdaiǵa bailanysty ekenin eshkimge dáleldeýdiń qajeti joq. Ótinishte kósretilgen málimetter qabyldanady. Ekinshiden bári elektrondy túrde bolady. Ótinish tapsyrý jaǵynan kóptegen halyq tarapynan sura, qiyndyq bolyp jatyr. Sondyqtan biraz tehnikalyq sheshimderdi iske asyryp jatyrmyz», - dedi ol.
