QR Úkimetindegi brifingte QR eńbek jáne halyqty áleýmettik qorǵaý ministri Birjan Nurymbetov "42 500 teńge kóleminde tólem alýǵa ótinimderdi qabyldaý qaita jalǵasa ma jáne jyl qorytyndysy boiynsha jumyssyzdyq deńgeii qandai bolady" degen suraqtarǵa jaýap berdi, dep habarlaidy "Ult aqparat".
Nurymbetov 42 500 teńge — tótenshe jaǵdai engizilgenge deiin jumys istegen, alaida TJ engizilýine bailanysty tabysynan aiyrylǵan azamattarǵa beriletin tólem ekenin eske saldy.
«Búginde jalpy 4 mln 539 myń adam bul ótemaqyny aldy, oǵan barlyǵy 193 mlrd teńge jumsaldy», — dedi ministr.
Sondai-aq Nurymbetov osy jyldyń 16 sáýirine deiin ótinish bergen adamdar ekinshi ai úshin de tólem ala alatynyn túsindirdi. Mundai azamattar sany — 3 mln 735 myń adam.
«Mamyr aiynan bastap biz tólemniń ekinshi kezeńin bastadyq. 5-6 mamyr kúnderi demalys aldynda biz 2 mln-ǵa jýyq adamnyń ótinimin resimdedik jáne 99 mlrd teńge bankterge jiberildi. Keibir azamattar ekinshi ai úshin tólem alyp úlgerdi, biraq bankter jumys istemegendikten, barlyǵy ala almady, endi bankter osy tólemderdi tiisti adamdarǵa jibere bastaidy», — dedi Birjan Nurymbetov.
Sonymen qatar ol búgingi tańda áleýmettik tólemder boiynsha ótinishter qabyldaý aiaqtalǵanyn habarlady.
«Búgin TJ rejimi aiaqtaldy jáne biz ótinimderdi qabyldaýdy toqtatamyz. Alaida, 11 mamyrǵa deiin qabyldanǵan ótinishter mindetti túrde qaralady jáne sáikes bolǵan jaǵdaida tólem jasalady», — dep atap ótti ministr.
Sonymen qatar QR eńbek jáne halyqty áleýmettik qorǵaý ministri TJ eki ailyq rejimine jáne budan ári jalǵasatyn karantinge bailanysty elimizde kútiletin jumyssyzdyq deńgeiine jasalǵan boljamdy jariialady.
B. Nurymbetov habarlaǵandai, eńbek naryǵyndaǵy jaǵdai jáne jumyspen qamtýdy qalpyna keltirý, birinshi kezekte, karantindik sharalardyń tómendeý jáne báseńdeý qarqynyna jáne kásiporyndar men uiymdardyń qyzmetin qaita bastaýǵa, sondai-aq ekonomikany jandandyrý sharalaryna bailanysty bolady.
«Árine, jumyspen qamtýdy qalpyna keltirý jeńil úderis emes. Degenmen, Eńbek jáne halyqty áleýmettik qorǵaý ministrligi deńgeiinde boljam jasaldy: biz karantindik sharalardy báseńdetýdiń negizgi kólemi maýsym-shilde ailarynda bolsa, jumyspen qamtýdy tolyq qalpyna keltirý osy jyldyń IV toqsanynda bastalady dep esepteimiz. Jyl qorytyndysy boiynsha jumyssyzdyq deńgeii tótenshe jaǵdai rejimin engizgenge deiingi 4,8 paiyzben salystyrǵanda 5,9% deńgeiinde bolýy múmkin», — dedi ministr.
Búginde Úkimet halyqty jumyspen qamtamasyz etý boiynsha sharalar qabyldaǵan, Jumyspen qamtýdyń jol kartasy iske qosyldy, «Eńbek» baǵdarlamasynyń múmkindikteri keńeitildi.
«Ózge toǵyz memlekettik baǵdarlamalarmen qatar, olardyń áleýetin eskere otyryp, 2020 jyly 1 mln 200 myńnan astam adam jumyspen qamtylady», — dedi ministr sózin túiindep.
