«42 500 teńge» tólemine ótinimder qabyldaý kezeń-kezeńmen júzege asyrylady, dep habarlaidy QazAqparat.
«Azamattarǵa yńǵaily bolý jáne portaldardyń shamadan tys júktelýine jol bermeý maqsatynda egov.kz jáne 42500.enbek.kz-te Memlekettik áleýmettik saqtandyrý qorynan eń tómengi jalaqy – 42 500 teńge mólsherinde birjolǵy tólem taǵaiyndaýǵa ótinishterdi qabyldaý kezeń-kezeńmen júzege asyrylatyn bolady», - delingen QR Eńbek jáne halyqty áleýmettik qorǵaý ministrliginiń aqparatynda.
Vedomstvo málimetinshe, 16 shildeden bastap biryńǵai jiyntyq tólemdi tóleýshiler bolyp tabylatyn adamdar úshin sms-habarlamalardy jiberý arqyly birjolǵy tólemdi taǵaiyndaý boiynsha proaktivti qyzmet kórsetý júzege asyrylady. Osy sanattaǵy, proaktivti qyzmetti paidalanbaǵan azamattar úshin ótinimderdi qabyldaý proaktivti qyzmetti kórsetý aiaqtalǵannan keiin júzege asyrylady.
Jeke kásipkerler, azamattyq-quqyqtyq sipattaǵy sharttar boiynsha tabys alatyn adamdar jáne jeke praktikamen ainalysatyn adamdar úshin tólemge ótinimder qabyldaý 17 shildede bastalady.
Óz qyzmetkerlerine ótinim beretin jumys berýshiler (zańdy jáne jeke tulǵalar) úshin ótinimderdi qabyldaý 19 shildeden bastalady.
Esterińizge sala keteiik, 700 myń qazaqstandyq «42 500 teńge» tólemin proaktivti túrde taǵaiyndaý úshin SMS-habarlama alǵan bolatyn.
Kelesi arnalardy paidalana otyryp, ótinish berýge bolady:
- egov.kz – «elektrondyq úkimet» veb-portaly;
- 42500.enbek.kz portaly;
- telegram-bot-tar;
- Aitu messendjerindegi 42500.enbek.kz qosymshasy;
- ekinshi deńgeidegi bankterdiń mobildi qosymshalary men internet-resýrstary.
Ótinimderdi qabyldaý 2020 jyldyń 1 qyrkúiegine deiin jalǵasady.
