Jaldamaly jumysshylardyń 42 500 teńgege ótinimin jumys berýshi ǵana bere alady. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Áleýmettik tólem tóleýge qatysty erejelerdi aldaǵy 1-2 kúnde pysyqtap, aiaqtaimyz. Beisenbi kúni múmkin bolsa, aldaryńyzǵa taǵy kelip, sol pysyqtalǵan tetikter týraly tolyq aqparat bergim keledi. Al qazir qandai ózgerister múmkin ekendigin sizderge jetkizsem. Birinshiden, jaldamaly jumysshylarǵa, qyzmetkerlerge qatysty bolmaq. Biz búgingi jaǵdailardy eskerýge májbúrmiz. Eń aldymen tótenshe jaǵdai rejimine qaraǵanda búgingi shekteýler kezinde biraz mekeme jumysyn jasap jatyr. Qurylys, óndiris, tipti qyzmet kórsetý, saýda salasynda da keibir shekteýlermen jumys júrgizilýde»,- dedi ministr Ortalyq kommýnikatsiialar qyzmetindegi brifing barysynda.
Onyń atap ótýinshe, ekinshiden, ár óńirdiń bas sanitar dárigeri sol oblysqa ǵana qatysty erekshe shekteýler ornatyp jatyr.
«Úshinshiden, 1 sáýirden bastap biraz mekeme, biraz sala jumysshylar úshin mindetti zeinetaqy jarnalaryn nemese áleýmettik jarnalardy tóleýden bosatyldy. Sondyqtan búgin atalǵan jarnalar arqyly qadaǵalaý múmkindigimiz shektelgen. Osyǵan bailanysty jaldamaly jumysshylarǵa qatysty osy joly zeinetaqy jarnamasy, áleýmettik jarnasy tólengeni týraly talap qoimaimyz. Ótken joly 12 aida keminde bir tólem bolýy kerek degen talap bolǵan. Bul joly onyń esh máni joq»,- dedi ol.
Ministrdiń aitýynsha, buǵan deiingi 42 500 teńge tóleý tájiribesimen jaldamaly jumysshylar úshin ótinishti tek onyń jumys berýshisi ǵana beretin bolady.
«Jumys berýshi qyzmetkerin aqysyz demalysqa jibergenin rastap, óziniń jumysshylarynyń atynan tapsyrys beredi. Ol úshin aldaǵy 1-2 kúnde portalymyzda jumys berýshilerge qyzmetkerleriniń tizimin, oǵan qatysty málimetterdi engizýi úshin óte yńǵaily servis jasaimyz. Óz kezeginde jumysshylar jumys berýshisiniń ótinish bermegenin, ótinishiniń qanaǵattandyrylǵanyn anyqtaýǵa arnalǵan servis qyzmetine júgine alady», - dedi Birjan Nurymbetov.
