42 500 teńge áleýmettik tólemin taǵaiyndaý jumystary 20 shildede bastalady. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
«Osy joly da 42 500 teńge áleýmettik tóleminiń operatory retinde Memlekettik áleýmettik saqtandyrý qory belgilendi. Óitkeni biz osy qordyń qarjylyq jaǵdaiy týraly «qazir shekteýi, qiyn« dep aitqanbyz. Degenmen, búgin sheshim qabyldandy. Sondyqtan Úkimet Ulttyq bankpen birlesip, osy bir aptanyń ishinde sol áleýmettik qordyń qarjylyq máselesin sheshýi tiis»,- dedi ministr Ortalyq kommýnikatsiialar qyzmetindegi brifing barysynda.
Onyń atap ótýinshe, qordyń qarjylyq máselesi sheshilgenge deiin Eńbek ministrligi osy tólemge qatysty erejeni pysyqtaityn bolady. Sodan keiin ony memlekettik organdarmen kelisip, Ádilet ministrliginde tirkeýi tiis.
«Osy ýaqytta biz ózimizdiń aqparattyq júiemizdi, portaldarymyzdy sol erejege sáikestendirip, testileýden ótkizemiz. Aianbai jumys isteimiz. Josparymyzǵa sáikes, aldaǵy juma kúni portaldar ótinishterdi qabyldaýǵa daiyn bolady. Al dúisenbi kúnnen bastap, iaǵni 20 shildeden tólemderdi taǵaiyndaýǵa kirispekpiz. Sondyqtan osy jumaǵa deiin elektrondy Úkimetke jáne basqa jerlerge ótinish berip áýre bolmańyzdar», - dedi Birjan Nurymbetov.
