Foto: Ernur Manapqan
Jetisý óńirindegi Jońǵar Alataýy ulttyq parki aýmaǵynda genetikalyq material retinde álemdi moiyndatqan Sivers almasy orman alqaptary 3800 gektar jer kólemin alýda, bul elimiz boiynsha qyzyl kitapqa engen jemis túriniń eń kóp shoǵyrlanyp ósken aýmaǵy, dep habarlaidy Ult.kz.
Ekologiia ministrliginiń habarlaýynsha, Bor dáýirinen osy kúnge deiin saqtalyp kelgen jabaiy almanyń 40-qa jýyq túri ulttyq park territoriiasynda erekshe qorǵaýǵa alynǵan.
«Biiktigi 6-8 metrge jetetin jemis aǵashynyń gúlderi iri, túsi aq nemese sur-qyzǵylt. Bul óte ádemi kórinis. Orman qory úlken aýmaqty alyp, taý bókterinde ornalasqandyqtan, quddy bir qyzǵylt kilem tóselgendei kórinedi. Sivers alma aǵashynyń gúldeýi sáýir-mamyr ailaryna kelip, osy ýaqytta keremet tabiǵat kórinisin tamashalaý úshin ulttyq park týrister sany artady. Sheteldik azamattar da keledi. Gúldeý kezeńiniń orta ýaqytynda, shamamen mamyr ailarynyń basynda 2018 jyldan beri festival ótkizip kelemiz. Maqsatymyz qorǵaýǵa alynǵan jemis túrimen tanystyrý», - dep atap ótti Jońǵar Alataýy ulttyq parki direktorynyń orynbasary T.Qasymhanova.
Aiazǵa tózimdi, klimattyq jaǵdailarǵa beiimdi. Dál osy erekshe qasietterine qarai, Sivers almasy genetikalyq qor retinde óte baǵaly. Jabaiy aǵash túrin saqtaý úshin ulttyq parkte arnaiy ǵylym bólimi qyzmet etedi, sondai-aq Almaty jáne Taldyqorǵan qalalaryndaǵy ǵylymi institýttarmen birlesken jumystar atqarylady. Sivers almasynyń ósetin aýmaqtarynda qoryqtyq kúzet rejimi belgilengen, iaǵni jemis ormandarynyń tabiǵi ekologiialyq tepe-teńdigin buzatyn barlyq sharýashylyq qyzmetke tiym salynǵan.
Al, kórem deýshi týristerge arnalǵan arnaiy «Ǵylymi-tanymdylyq týry» marshrýty qurastyrylǵan. Bul baǵyt jabaiy jemisti Sivers aǵashynyń ósetin jerlerimen ótedi.
