Eltańba, Tý jáne Ánuran – memlekettigimizdiń aiqyn belgisi, Qazaqstannyń egemen el ekenin búkil álemge tanytatyn qasietti qundylyqtar. Kók bairaǵymyzdy qasterlep, ony maqtanyshpen jelbiretý jáne keler urpaqqa amanat etý – barshamyzdyń qasietti boryshymyz.
Rámizder – jai ǵana resmi atribýttar emes. Olarda halqymyzdyń Táýelsizdigi, júrip ótken tarihi joly, rýhani qundylyqtary, el birligi men Qazaqstannyń jarqyn bolashaǵyna degen senimi kórinis tapqan. Týdy, Eltańbany jáne Ánurandy qurmetteý – elimizdiń tarihyna, búgingi bolmysyna jáne keleshegine qurmetpen qaraý.
QR Premer-Ministriniń orynbasary – Mádeniet jáne aqparat ministri Aida Balaeva barsha qazaqstandyqty osy qasterli kúnmen quttyqtap, memlekettik rámizderge qurmetpen ári jaýapkershilikpen qaraý – árbir azamattyń paryzy ekenin taǵy bir eske saldy.
"Memlekettik rámizderge qurmetpen ári jaýapkershilikpen qaraý – árbir azamattyń paryzy ekenin umytpaýymyz kerek. Olardy paidalaný zań talaptaryna, azamattyq mádenietke jáne qoǵamdyq jaýapkershilik qaǵidattaryna sai bolýy tiis. Memlekettik rámizderge salǵyrt qaraýǵa, qorlaýǵa nemese zańǵa qaishy áreket jasaýǵa jol berilmeidi. Óitkeni olar – Táýelsizdigimizdiń qasterli nyshandary", - dep atap ótti ol.
Memlekettik rámizderdiń máni jalpyulttyq referendým nátijesinde qabyldanǵan jańa Qazaqstan Respýblikasynyń Konstitýtsiiasy aiasynda airyqsha arta tústi. Ata zań ádiletti memleket, zań ústemdigi, azamattyq jaýapkershilik jáne ulttyq birlik qaǵidattaryn nyǵaitty. Osy turǵydan alǵanda, memlekettik rámizder – konstitýtsiialyq qundylyqtar men halqymyzdyń tutastyǵyn aishyqtaityn aiqyn belgi.
"Osy kúnderi elimizdiń barlyq óńirinde memlekettiliktiń basty atribýttaryna degen qurmetti arttyrýǵa, azamattardyń patriottyq sanasyn nyǵaitýǵa jáne ulttyq birlik qundylyqtaryn dáripteýge baǵyttalǵan tórt myńnan astam is-shara ótkizilip jatyr.
Qymbatty dostar!
Kók Týymyz, aibyndy Eltańbamyz jáne asqaq Ánuranymyz árdaiym qazaqstandyqtardyń júreginde maqtanysh, abyroi jáne el bolashaǵyna degen jaýapkershilik sezimin oiata bersin!Barshańyzǵa zor densaýlyq, ashyq aspan, tatýlyq pen baq-bereke tileimin!
Memlekettik rámizderi kúni qutty bolsyn!", - dep jazdy Aida Balaeva.
