Aqtóbe oblysynda «Vesenniaia Aralchinskaia» shahtasyndaǵy jarylys saldarynan 4 kenshi qaza tapqan bolatyn. Búgin tekserý qorytyndysy shyǵaryldy, dep habarlaidy "Ult aqparat".
2020 jyldyń 30 jeltoqsany kúni saǵat 21:21-de Hromtaý aýdany Kóktaý kentinen 30 shaqyrym jerde ornalasqan «Aqtóbe mys kompaniiasy» JShS-niń «Vesenniaia Aralchinskaia» shahtasynda jarylys jumystaryn júrgizý kezinde tórt jumysshy mert bolǵan edi. Eńbek jáne halyqty áleýmettik qorǵaý ministrligi janynan qurylǵan komissiia búgin tekserý qorytyndysyn shyǵardy.
«Jumysshylar ýlanyp, kóz jumǵan. Saýalnama jáne jumys berýshiniń tehnikalyq qujattamasy men jinalǵan materialdardy saralai kele jumystyń durys uiymdastyrylmaǵany, eńbek qaýipsizdigi, eńbekti qorǵaý qaǵidalarynyń buzylǵany anyqtaldy. Iaǵni, 90 paiyz jumys berýshiniń, 10 paiyzy jumysshylardyń kinási. Oǵan «Vesenniaia Aralchinskaia» ken ornynyń bas injeneri N.Safin kináli. Ol jarylys jumystary kezinde qaýipsizdikti qamtamasyz etpegen, jeldetkish jumysyn toqtatqan. Shań jeldetý qyzmeti ýchaskesiniń bastyǵy A.Harrasov jarylys jumystarynan soń jerastyndaǵy aýa eseptegish quralyǵysynyń durys jumys isteýin qamtamasyz etpegen. Al qaza tapqan jumysshylar qaýipsizdik erejesin saqtamady. Tergeý qorytyndysy politsiiaǵa berildi», - dedi Aqtóbe oblystyq eńbek inspetsiiasy basqarmasynyń basshysy Salamat Amanbaev.
Aita keteiik, Aqtóbe mys kompaniiasy mert bolǵan jumysshylardyń otbasyna 20 million teńge bóldi. Bul – birjolǵy kómek. Sonymen birge barlyǵynyń baspana máselesi sheshiledi. Iaǵni, ár otbasyna bir páter beriledi. Olar páterdi aýdan ortalyǵynan nemese Aqtóbe qalasynan ala alady. Balalary 18 jasqa jetkenshe ákeleriniń eńbekaqysyn alyp otyrady. Al aman qalǵan jumysshyǵa densaýlyǵyn qalpyna keltirý úshin 5 million teńge birjolǵy kómek berildi.
