Bilim jáne ǵylym vitse-ministri Bibigúl Asylova «Jýsan» operatsiiasy arqyly Siriiadan qaitarylǵan balalarmen qandai jumys júrgizilip jatqanyn baian etti, dep habarlaidy "Ult aqparat".
«Siriiadan 506 bala keldi. Qazirgi tańda elimizde jasóspirimderdi qoldaýǵa arnalǵan 15 áleýmettik-psihologiialyq, quqyqtyq ortalyq jumys istep tur. Ortalyqtyń táýlik boiǵy statsionarynda 14 balasy bar 4 ana júr. Qalǵandary - kúndizgi statsionarda. 254 bala mektepke deiingi tárbiemen qamtylǵan. Iaǵni, ol balalar mektepke deiingi uiymdarǵa baryp júr. Mektepterde 153 bala oqyp jatyr. Sondai-aq jetim qalǵan 33 bala bar. Olar jetimderge arnalǵan uiymdarǵa taratyldy», - dedi Bibigúl Asylova OKQ-da ótken baspasóz máslihatynda.
Vitse-ministrdiń aitýyna qaraǵanda, Bilim jáne ǵylym ministligi Siriiadan oralǵan balalardy jetildirýge, oqytýǵa arnalǵan jospar ázirleýde.
«Biz olardy nazardan tys qaldyrmaimyz. Bárine kómektesemiz. Ol keshendi sharalar ǵylymi zertteýlerden bastalady. Bul salaǵa ǵylymi turǵyda jaqyndap, psihologtar jiti jumys júrgizýi tiis. Ǵylymi qyzmetkerler birlestigin jiyp, olar atalmysh sanattaǵy balalarmen jumys júrgizýdiń amal-ádisterin bizge usynýy tiis. Sebebi, bizde buǵan deiin ondai tájiribe bolǵan joq. Mundai balalarmen jumys júrgizetin qyzmetkerlerdiń biliktiligin arttyrý kerek. Olardy ońaltýǵa arnalǵan baǵdarlama bolýy tiis. Jalpy, joba daiyn. Tek tiisti organdarmen maquldap alýdy kózdep otyrmyz», - dedi Bibigúl Asylova.
