QR Eńbek jáne halyqty áleýmettik qorǵaý ministriniń buiryǵyna sáikes 31,9 myń azamattyń múgedektik merzimi avtomatty túrde 3 aiǵa uzartyldy, dep habarlaidy "Ult aqparat".
Vedomstvo baspasóz qyzmetiniń málimetinshe, buryn belgilengen múgedektik toby úshin memlekettik járdemaqy tóleý 17 shildede júzege asyryldy.
«9 myńnan astam qazaqstandyq eGov.kz portaly arqyly onlain rejimde múgedektikti rásimdedi nemese uzartty. Bul múmkindik avtomatty túrde uzartýmen qatar, memlekettik mekemelerde adamdardyń kóp jinalýyn boldyrmaý jáne koronavirýs infektsiiasyn juqtyrý qaýpin azaitý maqsatynda múgedektigi bar adamdarǵa berildi. SOVID-19 taralýyna bailanysty shekteý sharalarynyń qoldanylýynyń barlyq kezeńi boiy azamattar múgedektikti belgileý jáne kýálandyrýdan qaita ótý úshin elektrondyq formatta ótinish bere alady», delingen habarlamada.
Ótinish berý úshin eGov.kz portalynda avtorlaný qajet jáne elektrondyq tsifrlyq qoltańba bolýy tiis.
Portalǵa kirgennen keiin joǵarǵy oń jaq buryshynda ashylmaly tizim bar batyrmany basyp, «Elektrondyq ótinishter» jáne «Qyzmetke onlain tapsyrys berý» degendi tańdaý qajet.
Sodan keiin ótinish berýshi óziniń jeke kabinetine kiredi, ol jerde «Qurý» túimesin basý kerek. Sodan keiin joldardy toltyrý kerek («óńir», «naqty turatyn mekenjaiy», «uialy telefon» jáne t.b.). «Alýshy» jolynda «Eńbek, áleýmettik qorǵaý jáne kóshi-qon komitetiniń aýmaqtyq departamenti» tarmaǵyn tańdańyz. Budan basqa, qujattardyń fotoǵa túsirilgen nemese skanerlengen kóshirmelerin qosa berý qajet. Tizimdi «Qajetti qujattar tizimi» siltemesine ótý arqyly kórýge bolady.
Sońǵy áreket – ETsQ kilttiń kómegimen ótinimge qol qoiý. Ol úshin «Sertifikatty tańdaý» batyrmasyn basý jáne ataýy «RSA...» - dan bastalatyn faildy tańdaý qajet, sodan keiin júie ashyq paroldi engizýdi talap etedi.
Ótinish berý nátijesinde ótinimge jeke kabinette statýs beriledi.
EGov.kz portaly arqyly múgedektikti belgileýge ótinish berý múmkindigi qazaqstandyqtar úshin tótenshe jaǵdaidy engizý kezinde alǵash ret paida boldy. Naýryz aiynan shilde aiyna deiin osy tásilmen 9 699 azamatqa múgedektik belgilengen.
