QR IIM Tótenshe jaǵdailar komitetiniń tóraǵasy Vladimir Bekker turǵyn úi sektorlarynda júrgizilip jatqan órttiń aldyn alý jumystary týraly aityp berdi, dep habarlaidy QazAqparat tilshisi.
«Demalys kúnderi halyqtyń kóbinde úiinde bolatynyn eskere otyryp, azamattyq qorǵaý bólimsheleriniń barlyq jeke quramy órt qaýipsizdigi sharalary týraly túsindirý jumystaryn júrgizý úshin aýlalardy aralap shyǵady. Tek ótken 2 apta ishinde jeke turǵyn úi sektorynda jumys isteý úshin Komitettiń, Tótenshe jaǵdailar departamentteriniń, órt sóndirý qyzmetteriniń 14 511 qyzmetkeri, órtke qarsy qyzmetter men uiymdardyń 1715 qyzmetkeri men 2120 erikti tartyldy», - dedi Vladimir Bekker TJK-da ótken baspasóz máslihatynda.
Onyń aitýynsha, osy ýaqytqa deiin 262 myń turǵyn úidiń turǵyndarymen túsindirý jumystary júrgizilgen. Peshterdi paidalaný men elektr jabdyqtaý kezinde 138 myń órt qaýipsizdigi talaptaryn buzýshylyǵy anyqtalǵan.
«Reidtiń is-sharalar barysynda halyqpen nusqaýlyq júrgiziledi. Peshti paidalaný kezinde órt qaýipsizdiginiń negizgi talaptary, avariialyq jaǵdaidaǵy aqaýy bar elektr quraldaryn paidalanýǵa jol bermeý, halyqtyń otty abaisyz paidalanbaýy týraly jadynamalar men nusqaýlyqtar taratylady. Ókinishke qarai, 31 myń úidiń iesi tekserý júrgizýden bas tartty. Júrgizilgen jumystyń qorytyndysy boiynsha halyqtyń áleýmettik toptaryna jatatyn úilerde órt qaýipsizdigi talaptaryn buzý jaǵdailary týraly kómek kórsetý úshin jergilikti atqarýshy organdaryna, áleýmettik qorǵaý jáne bilim berý basqarmalaryna habardar etildi», - deidi ol.
Spiker málim etkendei, qysqy merzimge daiyndyq aiasynda ótken jyldyń qyrkúiek jáne jeltoqsan ailarynda aldyn ala órt qaýipsizdigi ailyqtary ótkizilgen. 2018 jyldyń qarasha, jeltoqsany men osy jyldyń qańtar aiynda turǵyn úilerdegi órt sany 2 paiyzǵa, adamdardyń qaza bolý oqiǵalary 27 paiyzǵa azaiǵany baiqalǵan.
