Almatyda sintetikalyq esirtkini saqtap, taratty degen kúdikpen 40 jastaǵy er adam ustaldy. Odan jáne jasyryn qoimalardan júzdegen esirtki oramasy tárkilendi, dep habarlaidy ult.kz.
Arnaiy operatsiiany Almaty qalalyq politsiia departamentiniń Esirtki qylmysyna qarsy is-qimyl basqarmasynyń qyzmetkerleri júrgizdi.
Kúdiktini jeke tintý kezinde birneshe ondaǵan orama tabylsa, onyń avtokóligin tekserý barysynda dál osyndai júzden astam orama tárkilengen. Sondai-aq turǵylyqty jerinde júrgizilgen tintý kezinde saraptamaǵa jiberilgen belgisiz zattar, elektrondy tarazy, qaptama materialdary jáne esirtkini bólshektep oraýǵa arnalǵan quraldar anyqtalǵan.
Tergeý barysynda politsiia Almaty qalasynyń aýmaǵynan bes jasyryn qoimany taýyp, olardan taǵy 300-den astam oramany tárkiledi. Barlyq zattai dáleldemeler saraptamaǵa joldandy.
Qazir atalǵan derek boiynsha sotqa deiingi tergeý jalǵasyp jatyr. Quqyq qorǵaý organdary tárkilengen zattardyń naqty quramyn, jetkizý arnalary men kúdiktiniń qylmystyq árekettegi yqtimal rólin anyqtap jatyr.
