Foto: ashyq derekkóz
Astanada «Bedeýlikti emdeýdiń zamanaýi tásilderi. QRT: búgini men bolashaǵy» atty Qazaqstannyń reprodýktivtik meditsina qaýymdastyǵynyń XVII Halyqaralyq kongresi ashyldy. Is-sharada Densaýlyq saqtaý vitse-ministri Timýr Sultanǵaziev sóz sóilep, eldegi reprodýktivtik meditsina salasynyń jetistikterin atap ótti, dep habarlaidy Ult.kz.
Vitse-ministrdiń aitýynsha, sońǵy 30 jylda elimizde ekstrakorporaldyq uryqtandyrý (EKU) baǵdarlamalarynyń arqasynda 40 myńǵa jýyq bala ómirge kelgen.
«Ult saýlyǵy analardyń densaýlyǵy men ómir sapasymen tikelei bailanysty. Bedeýlik máselesin sheshý – árbir azamattyń otbasy qurý quqyǵyn júzege asyrýdyń mańyzdy bóligi», — dedi Sultanǵaziev.
Qazaqstanda búginde 32 EKU ortalyǵy jumys isteidi, onyń 19-y mindetti áleýmettik meditsinalyq saqtandyrý júiesi aiasynda qyzmet kórsetedi. Úsh iri memlekettik ortalyq — Ana men bala ulttyq ǵylymi ortalyǵy, Akýsherlik, ginekologiia jáne perinatologiia ulttyq ǵylymi ortalyǵy, jáne Aqtóbe oblystyq perinataldyq ortalyǵy.
Sondai-aq, 2021 jyldan beri júzege asyrylyp kele jatqan «Ańsaǵan sábi» memlekettik baǵdarlamasy aiasynda 11 myńnan astam bala dúniege keldi.
«Bizdiń klinikalar Ortalyq Aziia elderiniń mamandary úshin tájiribe mektebine ainaldy. Qazaqstandyq reprodýktologtardyń jetistikteri shetelde de keńinen tanymal», — dedi Sultanǵaziev.
Vitse-ministrdiń sózinshe, Qazaqstan búginde qosalqy reprodýktivtik tehnologiialardy (QRT) qoldaný tájiribesi eń damyǵan elderdiń qatarynda.
«Bedeýlik – tek meditsinalyq emes, sonymen qatar áleýmettik másele. Ol kóptegen otbasylardyń taǵdyryna áser etedi. Biz bul baǵyttaǵy júieli jumysty jalǵastyramyz», — dedi ol.
Almatyda ótip jatqan kongreske biyl Qazaqstanmen qatar álemniń 25-ten astam elinen 1000-nan astam maman qatysýda. Olardyń qatarynda Aýstraliia, Germaniia, Ulybritaniia, AQSh, Japoniia, Túrkiia, Úndistan, Resei jáne Ózbekstan siiaqty elderdiń jetekshi ǵalymdary bar.
Kongress bedeýlikti emdeýdiń innovatsiialyq tásilderine, erler men áielderdiń reprodýktivtik densaýlyǵyn jaqsartýǵa jáne meditsinanyń etikalyq qyrlaryna arnalǵan.
