QR Densaýlyq saqtaý ministri Eljan Birtanov Prezident tapsyrmasy aiasynda qai qyzmetkerlerdiń jalaqysy kóteriletinin aitty. Búgin «Nur Otan» partiiasynyń XVIII sezinde Memleket basshysy Nursultan Nazarbaev 1 shildeden bastap jalaqysy tómen biýdjettik sala qyzmetkerleriniń ailyǵyn 30 protsentke kóterýdi tapsyrdy, dep xabarlaidy QazAqparat tilshisi.
«Elbasy tikelei tapsyrma berip jatyr. Biýdjettik sala qyzmetkerleriniń jalaqysyn 30 protsentke kóterý kerek. Jalpy, búginde bizdiń salada 60 myńnan astam dáriger jumys isteidi. Sonymen qatar, 170 myń meiirbike bar. Budan bólek, sanitarlar, injenerler, býxgalter-ekonomister bar, qosymsha 400 myńnan asa adam eńbek etedi. Árine, kóbiniń jalaqysy 100 myńnan tómen. Birinshiden, osy tizimderdi qarap, esep-qisabyn jasap, iske asyrýǵa daiyndaimyz. Osy maqsatta qosymsha qarjy bólindi. Biyl 1 shildeden bastap tómen jalaqy alatyn barlyq meditsina salasynyń qyzmetkerleri qosymsha ústemeaqy alady», - dedi E.Birtanov jýrnalisterge bergen suxbatynda.
Ministrdiń aitýynsha, aǵymdaǵy jyly 1 qańtarda meditsina qyzmetkerleriniń jalaqysyn 20 protsentke kóterý sharalary bastaldy.
«Ony mańyzdy aýrýlar boiynsha arnaiy baǵdarlamany oqyǵan dárigerler men meiirbikelerge qosyp jatyrmyz. Qazirgi kezde qyzmetkerlerdiń 17 protsenti oqýdan ótip, jalaqyǵa qosymsha 20 protsenttik ústemeaqyny aldy. Endi Elbasy tómen jalaqy alatyn biýdjettik mekeme qyzmetkerleriniń jalaqysyn 30 protsentke kóterýdi tapsyryp otyr. Bul - óte qýanyshty jaǵdai», - dep atap kórsetti E.Birtanov.
Aita keteiik, búgin Memleket basshysy Nursultan Nazarbaev jalaqysy tómen biýljettik sala qyzmetkerleriniń ailyǵyn kóterý úshin qosymsha qarjy bólýdi júktedi.
«Osy jyldan bastap qańtar aiynda bazalyq ailyq mólsherin bir jarym esege ósirdik. Muǵalimderdiń ailyǵyn 30 paiyzǵa, biliktiligin arttyrǵan ustazdarǵa 50 paiyzǵa arttyrdyq. Demek, osy sanattaǵy azamattardyń kirisi aitarlyqtai ósti. Bul baǵdarmada bir million azamattyq qyzmetkerdi qamtidy. Osy jyldyń 1 shildesinen bastap biýdjet salasyndaǵy ailyǵy tómen qyzmetkerlerdiń jalaqysyn 30 paiyzǵa arttyrýdy tapsyramyn. Biz olardy qoldaýymyz kerek. Osy maqsatta 2019-2021 jyldary qosymsha 980 mlrd teńge bólinetin bolady», - dedi Nursultan Nazarbaev «Nur Otannyń» kezekti sezinde.
Budan bólek, densaýlyq saqtaý salasyn damytýǵa qosymsha 120 mlrd teńge bólinedi.
