Foto: blog.kaspersky.kz
Balasynyń emine dep jurttan 1,3 mlrd teńgeden astam aqsha jinaǵan dep kúdikke ilingen erli-zaiyptylardyń ústinen tergep-tekserý bastaldy, dep habarlaidy Ult.kz.
Astana qalasy boiynsha Qarjy monitoringi agenttiginiń departamenti ulynyń emine qarajat jinaý úshin keń kólemdi jarnama naýqanyn uiymdastyrǵan erli-zaiyptyǵa qatysty alaiaqtyq faktisi boiynsha tergep-tekserýdi júrgizýde.
"Tergeý amaldaryna sai, balanyń qatysýymen kórsetilgen beinerolikter, áserli jazbalar Instagram jáne Facebook arqyly júrgizilgen targettelgen jarnama myńdaǵan qazaqstandyqtyń júregine áser etken. Azamattardyń senimi men janashyrlyǵyn paidalana otyryp, kúdiktiler 1,3 mlrd teńgeden astam kólemde qarajat jinaǵan", - delingen habarlamada.
Alaida, kúdiktiler balanyń emine tek 6,4 mln teńge jumsalǵan. Qalǵan qarajat erli-zaiypty jeke qajettilikterine paidalanylǵan. Naqty aitqanda, elordada 3 páter, jer telimi, 5 avtokólik satyp alynǵan. Sonymen qatar, qarajattyń bir bóligi qumar oiyndaryna jumsalǵan.
"Qaiyrymdylyq qarjysyn turaqty túrde alyp otyrý úshin olar kelip túsken qarajattyń úshten bir bóligin (481 million teńgeden astam) áleýmettik jelidegi paraqshalaryn jarnamalaýǵa baǵyttaǵan. Meta Ads arqyly júrgizilgen jarnama aýditoriiany edáýir keńeitip, qaiyrymdylyq kólemin arttyrýǵa múmkindik bergen.
Kúdiktiler Túrkiiadaǵy LIV Hospital klinikasynda 84 mln teńge turatyn ota jasatamyz degen jeleýdi de paidalanǵan. Qajetti soma jinalǵanymen, shetelde ota jasalmaǵan. Kerisinshe, olar Instagram paraqshasynda áýejaidaǵy «ushyp bara jatqan» kórinisti beineleitin rolik jariialap, operatsiia sátti ótti degen jalǵan aqparatpen jazba salǵan", -delingen Qarjy monitoringi agenttiginiń habarlamasynda.
Sotqa deiingi tergep-tekserý bastalǵanyn bilgen soń, olar qylmystyq jolmen alynǵan aktivterdi tárkileýden jasyrý maqsatynda jer telimin úshinshi tulǵanyń atyna rásimdegen. Alaida tergeý bul mámileniń jalǵan ekenin dáleldedi.
Sot sanktsiiasymen qylmystyq jolmen alynǵan múlikterdiń barlyǵyna tyiym salyndy. Kúdiktilerge qatysty bultartpaý sharasy retinde úiqamaq túri tańdaldy.
QR Konstitýtsiiasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árkim kinásiz dep esepteledi.
