«Qazaqstan» teleradiokorporatsiiasy Táýelsizdiktiń 30 jyldyǵyna orai 3 myń qazaqstandyqtyń qatysýymen memlekettik ánuranǵa beinebaian túsirdi, dep habarlaidy QazAqparat.
Atalǵan ministrliktiń qoldaýymen Táýelsizdiktiń 30 jyldyǵyna orai 3 myń qazaqstandyqtyń qatysýymen Memlekettik Ánuranǵa beinebaiandy «Qazaqstan» teleradiokorporatsiiasy túsirdi.
Beinebaianǵa QR Ulttyq qaýipsizdik komiteti Shekara qyzmeti jáne QR Ulttyq Ulanynyń 180 sarbazy, «Astana Opera» memlekettik opera jáne balet teatry men Nur-Sultan qalasy ákimdigi Memlekettik akademiialyq filarmoniiasynyń 120 ártisi, «Qazaqstan» teleradiokorporatsiiasynyń 150 qyzmetkeri jáne óńir jastary, stýdentter, sala mamandary men qarapaiym el turǵyndary qatysty.
Túsirilim jumystary Nur-Sultan, Almaty, Aqtaý, rýhani astana - Túrkistan qalalarynda júrgizilip, negizgi kóriniske elordadaǵy «Qazaq Eli» monýmenti, «Astana Opera» memlekettik opera jáne balet teatry, Qazaqstan Respýblikasynyń Ulttyq mýzeii, «Qazmedia» ortalyǵy» teleradiokesheni, Almatydaǵy Respýblika alańy, Ál-Farabi atyndaǵy Qazaq Ulttyq ýniversiteti, «Kóktóbe» demalys kesheni, Túrkistandaǵy «Kerýen sarai» týristik kesheni, Qoja Ahmet Iasaýi qoryq-murajaiy, Kaspii teńizi men Almaty oblysynyń Sharyn shatqaly, Aqmola oblysyndaǵy Býrabai ulttyq parki jáne Mańǵystaý oblysynyń Aqespe taýy alyndy.
Ánurandy el turǵyndarymen birge opera jáne estrada ánshileri S.Baiǵojin, A. Jyltyrkózov. J. Shybyqbaev, N.Úsenbaeva, E. Vitsinskaia, T. Zabirova, A. Balajanova, M. Salyqov, K. Tólenbaeva, O. Altynbekov, B. Qilymhan, M. Anarbek, E. Narimanuly oryndady.
Sonymen birge beinebaianǵa QR Syrtqy ister ministrligimen birlese AQSh, Túrkiia, Resei, Qytai elinde qyzmet etip jáne bilim alyp júrgen el azamattary men osy elderdegi qandastar toptastyryldy. «Qazaqstan» teleradiokorporatsiiasy beinebaian túsirilimine qoldaý kórsetkeni úshin elimizdiń Syrtqy ister ministrligine alǵys bildiredi.
Beinebaian «Qazaqstan», «Abai tv», «Balapan», «Qazsport» telearnalary men 14 aimaqtyq arna efirinen 15 jeltoqsannan bastap kún saiyn kórsetiledi.
