Almatyda zeinetker áieldi telefon alaiaqtarynyń qurbany bolýdan saqtap qalǵan kýrer Nartai Esimhanov marapattaldy. Onyń qyraǵylyǵy men azamattyq jaýapkershiligi qylmystyń aldyn alýǵa múmkindik berdi, dep habarlaidy ult.kz.
Polisia.kz málimetinshe, oqiǵa kýrer kezekti tapsyrysty oryndaý kezinde bolǵan. Nartai zeinetker áielden ishinde jeke zattary bar paketti qabyldap alǵan. Alaida onyń mazasyz kúide bolǵanyn jáne pakettegi zattar týraly naqty jaýap bere almaǵanyn baiqaǵan.
Jaǵdaidyń kúmándi ekenin túsingen kýrer jetkizýdi jalǵastyrmai, birden politsiiaǵa habarlasqan. Oqiǵa ornyna kelgen tártip saqshylary áieldiń telefon alaiaqtyǵynyń qurbany bolǵanyn anyqtady.
Alaiaqtardyń sózine sengen zeinetker 3 myń AQSh dollaryn djinsy shalbarynyń qaltasyna salyp, ony paket arqyly kýrerge bermek bolǵan. Nartaidyń der kezinde jasaǵan áreketiniń arqasynda qylmysqa jol berilmei, áieldiń barlyq qarajaty ózine qaitaryldy.
Azamattyq belsendiligi men jaýapkershiligi úshin Almaty qalasy politsiia departamentiniń bastyǵy Aidyn Kabdýldinov kýrerge alǵys hat pen estelik syilyq tabystady.
«Búgin biz politsiia qyzmetkeri bolmasa da, óz áreketimen azamattardy qylmystan qorǵaýǵa eleýli úles qosqan azamatqa qurmet kórsetip otyrmyz. Osyndai beijai qaramaityn adamdardyń arqasynda qylmystyń aldyn alýǵa múmkindik týady», – dedi Aidyn Kabdýldinov.
Al Nartai Esimhanov sol sátte jaǵdaidy júrek qalaýymen baǵalaǵanyn aitty.
«Ájeidiń kózine qaraǵan sátte onyń qatty qorqyp turǵanyn túsindim. Sol kezde óz anam esime túsip, "eger onyń ornynda meniń anam bolsa she?" degen oi keldi. Sondyqtan birden politsiiaǵa habarlastym», – dedi ol.
Kýrer áriptesterin de qart adamdarǵa erekshe nazar aýdaryp, kúmándi jaǵdailarda birden politsiiaǵa habarlasýǵa shaqyrdy.
«Múmkin, dál sizdiń qońyraýyńyz qylmystyń aldyn alyp, bireýdi úlken shyǵynnan saqtap qalar», – dedi Nartai Esimhanov.
