Tótenshe jaǵdai kezinde tabysynan aiyrylýyna bailanysty 3 millionnan astam adamǵa Memlekettik áleýmettik saqtandyrý qorynan tólemder taǵaiyndaldy, dep habarlaidy "Ult aqparat".
«3 mln 79 myń 960 adamǵa TJ kezeńinde tabysynan aiyrylýyna bailanysty Memlekettik áleýmettik saqtandyrý qorynan (MÁSQ) áleýmettik tólem taǵaiyndaldy. 16 sáýirdegi saǵat 11:00-degi jaǵdai boiynsha TJ kezeńinde tabysynan aiyrylýyna bailanysty áleýmettik tólem taǵaiyndaý úshin 5 mln 997 myń 567 azamattan barlyǵy 7 mln 251 myń 526 ótinish kelip tústi. Osylaisha, 1 mln 253 myń 959 qaitalanatyn ótinim tirkeldi», - delingen Eńbek jáne halyqty áleýmettik qorǵaý ministrligi baspasóz qyzmetiniń málimetinde.
Biregei ótinishterdiń eń kóp sany: Almaty oblysy – 752 901; Almaty qalasy – 722 112; Túrkistan oblysy – 705 755; Nur-Sultan qalasy – 464 526; Shymkent qalasy – 382 669.
Óńirler boiynsha kelesi oblystardyń turǵyndaryna járdemaqy eń kóp taǵaiyndalǵan: Almaty oblysy – 452 196; Túrkistan oblysy – 363 930; Almaty qalasy – 313 392.
«Derekterdi tekserý jáne ótinishti qaraý merzimi 3 jumys kúnin quraidy. Ótinishterdi qaraý merzimderiniń ulǵaiýyna jol bermeý maqsatynda azamattardan ótinishti bir ret berýlerińizdi suraimyz. MÁSQ-ta tólem jasaý týraly sheshim qabyldanǵannan keiin ótinish berýshige SMS-habarlama keledi. Keiinnen ótinish berýshiniń derekteri «Azamattarǵa arnalǵan úkimet» memlekettik korporatsiiasy» KEAQ-ǵa jiberiledi, ol ony ekinshi deńgeidegi bankterge tólem júrgizý úshin jiberedi», - dep naqtylady vedomstvo ókilderi.
Áleýmettik tólem alýǵa ótinimdi eGov portaly, 42500.enbek.kz veb-saity jáne https://t.me/Help42500Bot adresi boiynsha Telegram-bot arqyly berýge bolady.
