3 millionǵa jýyq adamǵa 42 500 teńge áleýmettik tólem tóleýden bas tartyldy. Onyń sebepterin Ortalyq kommýnikatsiialar qyzmetindegi brifingide QR Eńbek jáne halyqty áleýmettik qorǵaý ministri Birjan Nurymbetov túsindirip berdi, dep habarlaidy QazAqparat tilshisi.
«Biz 3 millionǵa jýyq adamnyń ótinishinen bas tarttyq. Osyǵan qatysty da saýaldar túsip jatqandyqtan túsindire keteiin. Birinshisi, jeke sáikestendirý nómirin durys kórsetpegen. 12 tsifrdy jańylyspai, tiianaqty túrde durys kórsetkenderińiz jón. Sebebi JSN-di teksergende sizdiki emes, basqa adamdiki bolyp shyǵýy múmkin. Sondyqtan mundai qatelerdi túzetip, qaita jiberý kerek. 160 myńdai adam osyndai qate jibergen», - dedi ministr.
Onyń aitýynsha, ekinshiden, bankterdiń rekvizitterine, esepshottarǵa qatysty da kóp másele týyndap jatyr. Iaǵni, azamattar ótinish bergen kezde KZ dep bastalatyn 20 tsifrdy kórsetý qajet.
«Keibireýler kartalarynyń 16 tsifrly nómirin kórsetedi. Biz banktegi sizdiń 20 tsifrly esepshotyńyzǵa, al bank kartańyzǵa aýdaryp beredi. Osy rette sizderdiń esepshottaryńyzdy qalai tekseretindigimizdi túsindirip bereiin. Ótinish kelgende banktik esepshotyńyzdyń 20 tsifrly ma ekendigin tekseremiz. 19 san bolsa durys emes. KZ degennen keiingi sandar qai banktegi esepshot ekenin kórsetedi. Eger ol jabylyp qalǵan bank bolsa, onda ótinishterińizdi keri qaitaryp jatyrmyz. 20 sany túgel bolsa tólem taǵaiyndaýǵa jiberemiz», - dedi ol.
Ministrdiń dereginshe, dál osy jerde taǵy bir problemalar týyndap otyr.
«Tólem taǵaiyndalǵannan keiin 1 jumys kúniniń ishinde sizder kórsetken esepshotqa qarajatty aýdaramyz. Biraq, osy kúnderi 800 myńnan astam adamnyń aqsha aýdarylǵan esepshotynan bank bizge keri qaitaryp jiberdi. Sóitsek, sizderdiń bergenderińiz ol bankterde jabylyp qalǵan esepshottaryńyz eken. Sodan keiin sol banktegi qoldanystaǵy basqa esepshottaryńyzǵa aýdaryp berdik. Munan bólek, 70 myń adamnyń ol bankte 20 tsifrly esepshoty bolmai shyqty. Sondyqtan sizderge «basqa, durys bank esepshotyn kórsetińizder» degen SMS jiberiledi», - dedi Birjan Nurymbetov.
Sonymen qatar, ministr úshinshiden memlekettik qyzmetshilerdiń, jabylmaǵan mekemelerdiń qyzmetkerleriniń ótinishteri keri qaitarylyp jatqandyǵyn aitty.
«Memlekettik organdarǵa, uiymdarǵa 42 500 teńgeniń qatysy joq. Sebebi olardyń jumystary shektelgen joq. Olar qashyqtan jumys istep jatyr. Sondyqtan memlekettik qyzmetshilerdiń ótinish tóleý, biryńǵai jiyntyq tólem tóleýi qajet emes. Tipti, memlekettik qyzmetkerge BJT tóleýge bolmaidy. Sebebi BJT tólegen adam kásipkerlikpen ainalysatyndyǵyn bildiredi. Al memlekettik qyzmetkerge kásipkerlikpen ainalysýǵa bolmaidy», - dedi Eńbek ministri.
Onyń atap ótýinshe, zeinetkerler men múgedekterdiń de ótinishteri keri qaitarylyp jatyr. Jalpy, bul sanattaǵy adamdar tótenshe jaǵdaiǵa deiin resmi túrde jumys istep, áleýmettik tólemder aýdarylsa, al qazir tabysynan aiyrylsa ǵana 42 500 teńge beriledi.
«Tórtinshiden, ótinishi keri qaitarylǵan 1 millionnan astam adamnyń sońǵy 12 aida Memlekettik saqtandyrý qoryna áleýmettik tólemderi tólenbegen. Mundai tólem negizgi shart bolǵannan keiin ótinishterdi keri qaitarýǵa májbúrmiz. Sońǵysy qaitys bolyp ketken adamdardyń nemese shetelge kóship ketip, sol jaqta turyp jatqan adamdardyń atynan da ótinish berilip jatyr», - dedi ol.
