Foto: QR TJM
Qazaqstannyń toǵyz óńirinde aýqymdy seismikalyq daiyndyq jumystary júrgiziledi, - dep habarlaidy «Ult aqparat» TJM málimetine silteme jasap.
3-4 maýsymda elimizdiń seismikalyq qaýipti óńirlerinde, Almaty, Shymkent qalalary men Abai, Jetisý, Almaty, Shyǵys Qazaqstan, Jambyl, Qyzylorda jáne Túrkistan oblystarynda "Jer-2024" Respýblikalyq komandalyq-shtabtyq oqý-jattyǵýy ótedi.
Oqý-jattyǵýdy úilestirý jónindegi respýblikalyq shtab Shyǵys Qazaqstan oblysy Óskemende ornalasqan.
"3 maýsym saǵat 10:00-de joiqyn jer silkinisine ushyraý múmkindigi bar óńirlerde "Barshanyń nazaryna!" sirena-sóileý qurylǵylary iske qosylady. Sondai-aq, adam kóp jinalatyn nysandarda seismikalyq jattyǵýlar ótkiziledi.
Oqý-jattyǵý azamattyq qorǵaýdyń memlekettik júiesiniń joiqyn jer silkinisi nátijesinde týyndaǵan tótenshe jaǵdaidy joiýǵa daiyndyq deńgeiin arttyrý maqsatynda júrgiziledi.
Atalmysh is-shara respýblikalyq jáne óńirlik azamattyq qorǵaý qyzmetteriniń, jergilikti atqarýshy organdardyń qatysýymen, shartty túrde joiqyn silkinis kezindegi is-áreketterdi pysyqtaý arqyly ótkiziledi", - delingen habarlamada.
Onyń barysynda avariialyq-qutqarý jumystary, zardap shekken turǵyndardy shuǵyl qabyldaý pýnktteri, olardy qabyldaý men kómek kórsetýge arnalǵan palatkalyq lagerler men dalalyq meditsinalyq aýrýhanalar kórsetiledi.
