QR Bilim jáne ǵylam ministri Ashat Aimaǵambetov biyl oqýshylarǵa attestat tapsyrý rásimi qalai ótetinin aityp berdi, dep habarlaidy "Ult aqparat".
«Osyǵan deiin oqý jylynyń aiaqtalýyna orai, 25 mamyrda dástúrli túrde sońǵy qońyraý soǵylyp keldi, iaǵni mektep bitiretin 9 jáne 11-synyp oqýshylary bar. Elimizde tórtinshi toqsan qashyqtan oqytý formatynda ótip jatyr jáne 25 mamyrda mektepte eshkim bolmaidy. Dástúrli formatta mektepte qońyraý soǵylmaidy. 25 mamyrda sońǵy qońyraýdy onlain formatta ótkizýdi josparlap otyrmyz», - dedi A. Aimaǵambetov onlain tártipte ótken baspasóz máslihatynda.
Sonymen qatar ministr attestat tapsyrý sharalaryna qatysty toqtaldy.
«3-4 maýsymda 11 synyp úshin attestat tapsyrý saltanaty ótkiziledi. Osy oraida Densaýlyq saqtaý ministrligimen keńes júrgizdik. Qazirgi jaǵdaiǵa qaramastan, atalǵan merzimde 11 synypqa arnap attestatty saltanatty túrde tapsyrý rásimin ótkizýdi josparlyp otyrmyz. Sonymen birge olar úshin sońǵy qońyraýdy uiymdastyramyz», - dep túsindirdi vedomstvo basshysy.
Onyń sózine qaraǵanda, atalǵan shara aiasynda birqatar shekteýler bolady.
«Sanitarlyq talaptar qatań saqtalady. Balalardyń, pedagogtardyń qaýipsizdigine airyqsha ekpin qoiamyz, meditsinalyq masqa taǵý mindetti bolady. Bul shara aýlada, iaǵni ashyq keńistikte ótedi. Ár synyp óziniń sharasyn jekelei uiymdastyrady. Araqashyqtyqty saqtaý úshin arnaiy belgiler qoiylady», - dedi ministr.
Budan buryn habarlanǵandai, 11-synyp túlekterine attestat 3-4 maýsymda tapsyrylady.
