Almaty oblysy Ashybulaq aýylynda 29 jastaǵy áieldiń ólimine bailanysty politsiia qylmystyq is qozǵady. Marqumnyń týystary onyń otbasynda zorlyq-zombylyq kórgen bolýy múmkin ekenin aityp otyr, dep habarlaidy ult.kz.
Qaza tapqan Gúlmiranyń ápkesi Áziza Myrzaqulovanyń sózinshe, sińlisi ómirge qushtar, jaqyndaryna únemi kómektesip júretin adam bolǵan. Týystary onyń mundai qadamǵa óz erkimen barǵanyna senbeitinin jetkizdi.
Marqum meditsina salasynda bilim alyp, shamamen bes jyl aýrýhanada jumys istegen. 26 jasynda ózinen 13 jas úlken azamatqa turmysqa shyǵyp, keiin egiz balany dúniege ákelgen.
Týystarynyń aitýynsha, otbasynda janjal jii bolǵan. Qaiǵyly oqiǵa bolǵan kúni Gúlmira jaqyndaryna beineqońyraý shalyp, kúieýiniń ózine kúsh kórsetetinin aitqan. Sondai-aq denesindegi jaraqattardy kórsetkeni de aitylady.
Marqumnyń anasy Orazgúl Monbekova qyzynyń ólimin otbasyndaǵy zorlyq-zombylyqpen bailanystyrady.
"Zorlyq-zombylyqtyń kesiri dep oilaimyn. Basqa eshqandai sebep joq. Máiithanada qyzymnyń denesindegi kógergen izderdi kórdim", – dedi ol.
Alaida marqumnyń qaiyn atasy bul aiyptaýlarmen kelispeitinin aityp, ulynyń áieline qol kóterýi múmkin emes ekenin málimdegen.
Almaty oblysy politsiia departamentiniń resmi ókili Ernar Saidildin atalǵan derek boiynsha qylmystyq is qozǵalǵanyn rastady.
"Atalǵan faktige qatysty qylmystyq is qozǵalyp, tergep-tekserý amaldary júrgizilýde. Tergeý nátijesi boiynsha protsessýaldyq sheshim qabyldanatyn bolady", – dedi politsiia ókili.
Qazirgi ýaqytta marqumnyń denesinde zorlyq-zombylyq belgileriniń bar-joǵyn anyqtaý úshin sot-meditsinalyq saraptama taǵaiyndalǵan.
Is boiynsha Gúlmiranyń kúieýi kúdikti retinde tanylǵan. Onyń kinási sotta dáleldengen jaǵdaida ǵana quqyqtyq jaýapkershilik máselesi sheshiledi.
