Elimizde 276 eldi meken sý basý qaýpi bar aimaqta jatyr. Bul týraly búgin Úkimet otyrysynda QR Tótenshe jaǵdailar ministri Iýrii Ilin málim etti, dep habarlaidy QazAqparat.
«Jalpy alǵanda tótenshe jaǵdaidy joiý úshin bes jyl ishinde 44 milliardtan astam teńge jumsaldy. Úkimettiń qoldaýymen memlekettik materialdyq rezervten óńirler úshin 365 birlik tehnika bronnan shyǵaryldy. Sonymen qatar, sý basý qaýpi bar aimaqta el boiynsha 276 eldi meken qalyp otyr, bul - 270 myńnan astam adam. Olardy sý tasqynynan qorǵaý úshin 2023 jylǵa deiingi jańa Jol kartasy bekitildi. Ony iske asyrýǵa respýblikalyq jáne jergilikti biýdjetterden qarjy bólý josparlanyp otyr», - dedi ministr.
Onyń aitýynsha, óńirlik deńgeide aldaǵy sý tasqyny kezeńine daiyndyq aiasynda: Tótenshe jaǵdailar jónindegi komissiianyń otyrystary ótkizildi; janar-jaǵarmai materialdary, inertti materialdar jáne qum salynǵan qaptardyń qory qalyptastyryldy; shuǵyl shyǵyndarǵa tótenshe rezervter jasalǵan, shamamen 38 milliard teńge aldyn ala qarastyrylǵan.
«Sany 38 myń adamnan asatyn azamattyq qorǵaý quramdary, shamamen 13 myń birlik tehnika, 500-den astam júzý jáne 2 500-den astam sý sorý quraldary aiqyndaldy. Eldi mekenderden qar shyǵarý jumystary jalǵasýda. Búgingi kúni 13 million tekshe metrden astam qar shyǵaryldy. Óńirlerdiń ákimdikteri eldi mekenderden qardy shyǵarý jumystaryn jandandyrýy qajet», - dedi Iýrii Ilin.
