Foto: ashyq derekkóz
27 naýryzda búkil álemde barsha teatr qyzmetkerleriniń kásibi merekesi – Dúniejúzilik teatr kúnin atalyp ótedi, dep habarlaidy Ult.kz.
Teatr – adam janynyń ainasy, oi men sezimniń úilesimi, ómirdiń túrli qyrlaryn sahnada sheber jetkizetin uly óner. Teatr – qoǵamnyń mádeni damýyna yqpal etetin qural.
"Qazaqstanda teatr ónerine qyzyǵýshylyq artyp keledi. Zal kórermenge toly, qoiylymdardyń premerasyna biletter eki-úsh apta buryn satylyp ketedi. Sahna ónerine qushtar jandardyń arasynda jastardyń kóp bolýy kóńilge erekshe qýanysh uialatady", – dep atap ótti Prezident Qasym-Jomart Toqaev IV Ulttyq quryltai otyrysynda.
QR Mádeniet jáne aqparat ministri Aida Balaeva búginde Qazaqstanda 70 teatr jumys isteitinin aitty. Olardyń 57-si – memlekettik teatr. Atap aitsaq, 11 respýblikalyq, 46 óńirlik teatr bar. Keiingi tórt jylda elimizde bes jańa memlekettik teatr ashyldy.
"Bul teatr óneriniń damyp kele jatqanyn, suranysqa ie ekenin kórsetedi", - deidi Aida Balaeva.
Qazaqstandyq teatrlar otandyq kórermendi jańa qoiylymdarmen qýantyp qana qoimai, elimizdi halyqaralyq arenada da tanytyp keledi. 2024 jyly 396 gastroldik sapar uiymdastyrylsa, onyń 350-i el ishinde, 46-sy shetelde ótti.
Otandyq teatrlarda 9 myńǵa jýyq maman jumys isteidi, onyń 4 200-i shyǵarmashylyq ujym ókilderi. Bir jyl ishinde Qazaqstannyń memlekettik teatrlary 200-den astam jańa qoiylym qoidy, olardyń 107-si otandyq avtorlardyń shyǵarmalary negizinde sahnalanǵan.
"Teatr óneri – talant pen talǵam, shynaiylyq pen adaldyqtan týǵan tekti óner. Osynaý erekshe kúni sahnada jáne sahna syrtynda eńbek etip júrgen barsha jandy quttyqtaimyn! Olar – akterler, rejisserler, dramatýrgter, stsenograftar, jaryq jáne dybys qoiýshy mamandar, kostiýmerler, grimerler, ákimshiler men tehnikalyq mamandar. Eń bastysy, bul qasterli ónerdi jan-tánimen jaqsy kóretin barsha kórermenge alǵysym sheksiz", - dep jazdy Aida Balaeva.
