Foto: dalanews.kz
Qazaqstanda 25 qazanda ulttyq mereke – Respýblika kúni atalyp ótedi. Biyl Respýblika kúni senbige túsip otyr. Bul demalys kúnin dúisenbi, 27 qazanǵa aýystyrý esebinen qosymsha bir kún demalys beredi. Nátijesinde qazaqstandyqtar úsh kún qatarynan: 25, 26 jáne 27 qazanda demalady. Osy oraida Ult.kz demalys kúnderi Astana men Almatyda demalys úshin baratyn jerlerdi usynady.
Biyl Respýblika kúni aiasynda elimizdiń qos megapolisi Almaty men Astana turǵyndary men qonaqtary úshin erekshe mazmundy ári keń aýqymdy merekelik baǵdarlama ázirlengen. Qala kósheleri men mádeni nysandarda otbasylyq serýender, jármeńkeler, kontsertter men ekologiialyq aktsiialar ótip jatyr.
Astanada ótetin sharalar
Elorda turǵyndary úshin de Respýblika kúni erekshe kóńil-kúi syilamaq. 25 qazan kúni Esil jaǵalaýynda, Mega Silk Way jáne Abu Dhabi Plaza ortalyqtarynda kontsertter men jappai marafon ótedi. Sol kúni A.Mámbetov atyndaǵy memlekettik drama teatrynda «Sáigúlik» qoiylymy kórermenge jol tartpaq.
25–27 qazan aralyǵynda «Dáýlet» tennis ortalyǵynda áýesqoilar arasynda týrnir ótedi. Qala alańdarynda estrada juldyzdarynyń qatysýymen kontsertter men halyqtyq serýender uiymdastyrylady.
Demalatyn oryndar
Astanalyqtar úshin Central Park, Presidential Park, Triathlon Park jáne Esil jaǵalaýy – otbasylyq demalystyń súiikti mekenderi. Al mádeniet jankúierleri Ulttyq mýzeige, EXPO aimaǵyndaǵy kórmelerge jáne Astana Opera sahnasyna at basyn bura alady.
Keshki ýaqytta Báiterek alańy men Love Park romantikalyq serýen úshin erekshe atmosfera syilaidy. Qalanyń aspanmen astasqan shamdary merekelik kóńil-kúidi odan ári arttyryp, Respýblika kúnin el táýelsizdiginiń, birliktiń jáne jańa jetistikterdiń nyshany retinde aishyqtai túsedi.
Almatyda ótetin sharalar
25–27 qazan aralyǵynda Almatyda Respýblika kúniniń 35 jyldyǵyna arnalǵan aýqymdy is-sharalar ótedi. Mereke 25 qazanda saǵat 11:00-de «Medeý» sport kesheninde Memlekettik Týdy kóterý jáne Ánurandy oryndaý rásiminen bastaý alady. Osydan keiin Respýblika saraiynyń aldyndaǵy alańda «Atameken» patriottyq aktsiiasy uiymdastyrylmaq.
Qalanyń basty merekelik alańdarynyń biri — Jibek joly kóshesinde ótetin qolónershiler men sýretshiler jármeńkesi. Munda sándik-qoldanbaly óner týyndylary, ulttyq naqyshtaǵy buiymdar men zamanaýi shyǵarmashylyq úlgiler usynylady.
Al qaladaǵy on iri saýda jáne oiyn-saýyq ortalyqtary — Forum, Aport Mall East, MEGA Almaty, Moskva Metropolitan, MEGA Park, Mart, Grand Park, Sputnik, Asia Park siiaqty oryndar kelýshilerge kontsertter, jármeńkeler, balalarǵa arnalǵan baǵdarlamalar jáne arnaiy jeńildikter usynady.
Respýblika kúnine orai uiymdastyrylatyn aýyl sharýashylyǵy jármeńkesi Qazybek bi kóshesinde (Abylai han dańǵylynan Panfilov kóshesine deiin) úsh kún boiy jalǵasady. Onda tórt óńirden kelgen 15 aýdannyń fermerleri men aýyl sharýashylyǵy óndirýshileri 400 tonnaǵa jýyq ónim usynady. Et, sút, kókónis, jemis-jidek jáne basqa da 50-den astam ónim túrin almatylyqtar tańǵy 08:00-den keshki 17:00-ge deiin tikelei óndirýshiden satyp ala alady.
Mádeni oryndar
Almatylyqtar men qala qonaqtary úshin mereke kúnderi tabiǵat aiasynda tynyǵýǵa da tamasha múmkindik bar. Kúzgi boiaýǵa bólengen Botanikalyq baq pen Ortalyq mádeniet jáne demalys saiabaǵy jaiaý serýendeýge óte qolaily bolsa, Prezident saiabaǵy men Jarokovtaǵy skverler qala ortasyndaǵy tynyshtyq mekeni ispetti.
Mádeniet súier qaýym úshin Qasteev atyndaǵy óner mýzeii, Aspan Gallery, Arvest galereialary zamanaýi jáne klassikalyq óner kórmelerin usynady. Keshki ýaqytta Abai atyndaǵy opera jáne balet teatry men Philarmonic Hall sahnalarynda merekelik kontsertter men qoiylymdar ótedi.
