24-30 tamyz aralyǵynda «Negizgi Zań aptasy» jobasy ótedi. Bul týraly Ortalyq kommýnikatsiialar qyzmetindegi baspasóz máslihatynda málim boldy.
«Konstitýtsiianyń tarihyna, 25 jyl ishindegi adamnyń konstitýtsiialyq quqyqtarynyń damýyna arnalǵan derekti filmder daiyndaldy. Barlyq óńirlerde konferentsiialar, dóńgelek ústelder, dárister, ashyq sabaqtar jáne basqa da is-sharalar ótýde. Olarǵa eńbek ujymdary, JOO, kolledj jáne mektep oqýshylary tartyldy. Konstitýtsiialyq Keńes BǴM-men birlese otyryp, joǵary oqý oryndarynyń zań fakýltetteriniń stýdentteri arasynda konstitýtsiialyq damý máselelerine arnalǵan úzdik jumysqa konkýrs ótkizdi», - dedi QR Konstitýtsiialyq Keńesiniń múshesi Únzila Shapaq.
Óz kezeginde QR Konstitýtsiialyq Keńesi apparatynyń basshysy Baqyt Nurmuhanov Konstitýtsiialyq Keńes Negizgi Zańnyń 25 jyldyǵynyń biryńǵai logotipin ázirlegenin atap ótti. Respýblika Konstitýtsiiasynyń 25 jyldyǵyn ótkizý jónindegi ulttyq is-sharalar josparyna sáikes biyldyń basynan beri josparly jumys atqarylyp jatyr.
Onyń sózine qaraǵanda, Konstitýtsiialyq Keńes biylǵy 24 tamyzdan bastap «Negizgi Zań aptasy» jobasyn ótkizedi. Jobanyń maqsaty – qoǵam men memleketti jańǵyrtýdaǵy Konstitýtsiianyń rólin tereń uǵyný, halyqtyń konstitýtsiialyq mádenietin arttyrý.
Osy joba aiasynda búkil el boiynsha onlain konferentsiialar, tegin zań konsýltatsiialary, vebinarlar, qaiyrymdylyq aktsiialary, jańa obektilerdi paidalanýǵa berý, páterlerdiń kiltterin, kýálikterdi tabys etý, demeýshilik kómek kórsetý jáne basqa da is-sharalar uiymdastyrylatyn bolady. Eldegi epidemiologiialyq jaǵdaiǵa qarai barlyq sharalar onlain rejimde ótedi.
Baǵdarlamada Negizgi Zańnyń mereitoiyna arnap shyǵarylǵan kitaptardyń tanystyrylymyn ótkizý kózdelgen. Ulttyq bank 25 tamyzdan bastap nominaldyq quny 100 jáne 200 teńge bolatyn jańa mereitoilyq monetalardy ainalymǵa shyǵarýdy josparlap otyr.
«Qazposhta» AQ «Estelik jáne mereitoilyq datalar» seriiasy boiynsha poshta markasyn ainalymǵa engizedi.
Biylǵy 27 tamyzynda Konstitýtsiia Kúnine arnalǵan negizgi shara retinde «HHI ǵasyrdyń Konstitýtsiiasy – quqyq ústemdigi, adam qundylyǵy jáne memleket tiimdiligi» taqyrybynda halyqaralyq konferentsiia ótkizý kózdelgen.
Konferentsiia aiasynda Aziialyq konstitýtsiialyq sottar qaýymdastyǵynyń (18 el) 4-shi Kongresi ótedi. Konferentsiia jumysyna Konstitýtsiialyq baqylaý organdary Eýraziialyq qaýymdastyǵynyń (9 el) músheleri de qatysady dep kútilýde. Qazirgi ýaqytta Konstitýtsiialyq Keńes 2 mlrd-tan astam halqy bar, 20-dan astam eldi qamtityn osy qaýymdastyqtarǵa tóraǵalyq etedi.
Negizinen álemniń barlyq kontinentteriniń jetekshi zańgerleri odan ári konstitýtsiialyq-quqyqtyq damýdyń ózekti máselelerin, onyń ishinde koronavirýs pandemiiasyna bailanysty máselelerdi talqylaityn bolady.
Sonymen qatar, QR Prezidentiniń Arhivi «Qazaqstan Respýblikasynyń Konstitýtsiiasy – memlekettiń turaqtylyǵy men órkendeýiniń negizi» atty tarihi-qujattyq kórmeni uiymdastyrady.
Mádeniet jáne sport ministrligi Respýblika Konstitýtsiiasynyń 25 jyldyǵyna arnalǵan onlain kontsert daiyndaýda. Ol memlekettik mereke qarsańynda telearnalar arqyly kórsetiletin bolady.
