Jambyl oblysy Shý aýdany ákiminiń burynǵy orynbasary jáne 12 býhgalter asa iri kólemde biýdjet qarajatyn jymqyrǵany úshin sottaldy, dep habarlaidy "Ult aqparat".
Jambyl oblysy boiynsha Sybailas jemqorlyqqa qarsy is-qimyl departamenti Shý aýdany ákiminiń burynǵy orynbasary K.I. Qojaǵappanovaǵa, aýdan ákimdigi bilim bóliminiń bas býhgalteri K. Aǵybaevaǵa jáne 11 býhgalterge qatysty asa iri mólsherde biýdjet qarajatyn jymqyrý faktisi boiynsha qylmystyq isti aiaqtady.
«Qojaǵappanova bas býhgalter K.S. Aǵybaevamen jáne 11 býhgaltermen aldyn ala sóz bailasý arqyly 2015 jyldan bastap 2018 jylǵa deiingi kezeńde jalpy somasy 233 146 525 teńge biýdjet qarajatyn aýdan mektepteri muǵalimderiniń jalaqy, eńbek demalysy jáne saýyqtyrý járdemaqysy túrindegi kartochkalyq shottaryna negizsiz aýdarý jáne qolma-qol aqshaǵa ainaldyrý jolymen jymqyrdy degen kúdikke ilindi», - delingen dapartament habarlamasynda.
Sondai-aq, departament 2020 jyldyń 24 jeltoqsanynda Jambyl oblysy Shý aýdandyq sotynyń úkimi shyqqanyn jetkizdi. Atap aitsaq, K. Qojaǵappanovaǵa (QR QK 189-b. 4-b. 2-t. boiynsha) 9 jylǵa, K. Aǵybaevaǵa (QR QK 189-b. 4-b. 2-t. boiynsha) 10 jylǵa bas bostandyǵynan aiyrý týraly jáne 11 býhgalterge qatysty túrli sheshimder shyǵyp otyr.
«Qojaǵappanova men Aǵybaeva Shý aýdandyq sotynyń zalynda qamaýǵa alyndy. Qojaǵappanova ómir boiyna memlekettik qyzmette laýazym atqarý quqyǵynan aiyryldy. Qalǵandary ártúrli merzimdermen qarjy institýttarynda qyzmet etý quqyǵynan aiyrylady», - delingen departament málimdemesinde.
