Búgin QR Premer-Ministri Asqar Maminniń tóraǵalyǵymen Elbasynyń «El úmiti» bastamasy aiasynda júzege asyrylyp jatqan jáne «100 naqty qadam» Ult josparyn sapaly oryndaýǵa baǵyttalǵan Ózgeristerdi basqarý jónindegi calalyq menedjerlerdi daiarlaý baǵdarlamasynyń Basqarýshy komitetiniń otyrysy ótti, dep jazady primeminister.kz.
Basqarýshy komitet Baǵdarlama qatysýshylaryn irikteý nátijelerin qarastyrdy, sondai-aq ózgerister menedjerleri komandasynyń quramy bekitildi, olar memleket saiasatynyń 11 salasynda: bilim berý, geologiialyq barlaý, saýda jáne logistika, ónerkásip, onyń ishinde jańa indýstriia, qurylys, óńirlik damý, densaýlyq saqtaý, media, aýyl sharýashylyǵy, týrizm jáne sý resýrstary salalarynda 43 naqty mindetti sheshýdi qamtamasyz etýi tiis.
Baǵdarlamaǵa qatysý úshin 2958 qazaqstandyq ótinim bergen, onyń ishinde 1345 úmitker irikteýdiń ekinshi kezeńine jiberilip, testileýden ótti. Onyń nátijesi boiynsha 662 úmitker úshinshi kezeń – quzyretteri boiynsha suhbat alý kezeńine ótti. Qorytyndysy boiynsha Baǵdarlamaǵa alý úshin 230 qatysýshy usynyldy.
Baǵdarlamaǵa iriktelgen qatysýshylardyń jartysynan astamynyń halyqaralyq bilimi bar, úshten biri halyqaralyq kompaniialarda tájiribe jinaqtaǵan, ortasha jasy – 35 jas. Qazirgi kezde ózgerister menedjerleriniń 70%-y – jeke sektorda, 30%-y – memlekettik jáne kvazimemlekettik uiymdarda jumys isteidi.
Baǵdarlama qatysýshylary salalyq mindetterdi sheshe otyryp, elimizdiń damýyna óz úlesin qosýmen qatar, salalyq ári kóshbasshylyq biliktilikterin shyńdaýǵa múmkindik alady. Ol úshin qatysýshylardyń treningtik jáne koýchingtik baǵdarlamalardan ótýi qarastyrylyp jatyr.
Salalyq mindetterdi sheshý kezinde ózgerister menedjerleri keńes jáne konsýltatsiia alý úshin memlekettik jáne jekemenshik sektordan arnaiy tańdalǵan 40-tan astam mentorǵa júgine alady.
Ózgeristerdi basqarý boiynsha salalyq menedjerlerdi daiyndaý baǵdarlamasyna qatysýshylardy irikteý biylǵy 15 aqpanda bastaldy. Baǵdarlamaǵa QR Tuńǵysh Prezidenti – Elbasy Qory bastamashy boldy, ol QR Úkimetiniń Jobalyq keńsesimen birlesip júzege asyrylyp jatyr.
