Foto: KamranAydinov/Freepik
Densaýlyq saqtaý ministri Ajar Ǵiniiat 21 jasqa deiingi azamattarǵa energetikalyq sýsyn satýǵa tyiym salynýy múmkin ekenin aitty, - dep habarlaidy Massaget.kz portaly.
Ministr bul balalardyń densaýlyǵyna áser etetinin jetkizdi.
"Qazirgi tańda Májiliste densaýlyq saqtaý salasyna bailanysty zań qaralyp jatyr. Sol zańnyń sheńberinde 21 jasqa deiingi azamattarǵa, balalarǵa energetikalyq sýsyn satpaý týraly norma qarastyrylyp jatyr. Densaýlyq saqtaý ministrligi tarapynan bul normany qoldap otyrmyz. Óitkeni bul balalar men jastardyń densaýlyǵyna tikelei bailanysty dúnie", - dedi ministr.
Ministrlik ókilderi mundai sýsyndarǵa nege birjola tyiym salynbaitynyn túsindirdi.
"Shektep, ishnara ishetin bolsa, energetikalyq sýsyndardyń densaýlyqqa ziiany joq. Biraq balalardyń 9 paiyzdan astamy ártúrli tátti sýsyndardy kúnde ishedi eken. Bul semizdikke, qant diabeti, júrek qan tamyrlary aýrýlaryna ákep soǵady. Balalar mólsherin bilmei, óz densaýlyǵyna jaýap bere almaidy. Al eresek azamattar óz densaýlyǵyna ózi jaýap berýi kerek. Sondyqtan jappai tyiym salý durys emes dep sanaimyn", - dedi Ajar Ǵiniiat.
Áleýmettik jelide adamdardyń Gorilla sýsynyn iship, aýyr naýqasqa shaldyqqany týraly videolar jii taraidy.
Jýrnalistiń "Bul aqparatqa senýge bola ma?" degen suraǵyna ministr naqty jaýap bermedi.
