Jalǵyzbasty ana eki balasyn Shymkent qalasy Abai aýdany ákimdigine tastap ketti. Tilshimizge suhbat bergen ákim orynbasary Nurlan Tilesh oqiǵanyń mán-jaiyn túsindirip berdi, dep habarlaidy Sputnik agenttigi.
"Bul oqiǵa ótken aptada juma kúni bolǵan. Túski asqa shyǵyp bara jatqanymda ol kelinshek tómende qabyldaýda otyrdy. Qolynda emizýli nárestesi, qasynda taǵy eki kishkentai balasy boldy. 5-6 jasar balalar-aý deimin. Jalpy, tórt bala-shaǵasy bar eken. Men odan neǵyp tursyz dep suraǵanmyn. Ol páter jaldap turatynyn jáne oǵan qaryz ekenin jetkizdi", - deidi Tilesh.
Abai aýdany ákimi orynbasarynyń aitýynsha, kelinshek áleýmettik kómekke balalardyń qujattaryn ótkizgenin aityp, sonyń ekinshi toqsanyn tezirek ótkizip berýin ótingen.
Nurlan Tileshtiń ózi kommýnaldyq máselelerge jaýap beredi. Biraq áleýmettik bólimge ótkizip, sol jerdegi mamandardan jalǵyzbasty ananyń qujattaryn qarap shyǵýyn suraǵan.
"Ol kisiden ataýly áleýmettik kómek aiasynda balalardyń 21 myń teńgesin aldyńyz ba dep surap edim, aldym dedi. Birinshi toqsanda bir ret 150 myń aldym, bir ret 170 myń aldym dedi. Durys, bopty dedim. Sodan kelesi toqsannyń aqshasyn tezirek túsirip berseńiz dep surady. Men qyzdarǵa tapsyrdym da, túski asqa ketip qaldym", - dep atap kórsetti Tilesh.
Ákimniń orynbasary úide otyrǵanda áleýmettik bólimniń qyzdary qońyraý shalyp, jalǵyzbasty ananyń eki balasyn tastap ketip qalǵanyn jetkizedi. Mamandar "102-ge" habar bergen. Al Nurlan Tilesh jumysqa barǵansha prokýratýra men ishki ister organdarynyń qyzmetkerleri kelip, máseleniń mán-jaiyn anyqtaýǵa kirisken.
"Saǵat eki jarymnyń kezinde anasy ózi kelgenin aitty. Astyna tússem, shynymen de, ol kisi kelipti. Jaǵdaiyn surasam, 30 myń teńgege páter jaldaimyn, jartysyn tólep, jartysyn tólei almai jatyrmyn dedi. Biz ol máseleni sheship beretinimizdi aittym. Basqa másele bar ma desem, azyq-túlik jaǵynan járdem surady. Oǵan da kelistik. Sóitip turǵanda ol áiel ózinen-ózi kóterilip, maǵan aqsha da, azyq-túlik te kerek emes. Maǵan úi kerek dep aiqailai bastady", - dedi Tilesh.
Osy kezde ákimdik qyzmetkerleri turǵyn-úi basqarmasyna baryp, kezekke turýǵa keńes beredi. Al tergeýshiler túsinikteme jazyp berýdi talap etken. Osy kezde jalǵyzbasty ana eki balasyn alyp, ketip qalǵan.
