Kúrish siiaqty sýdy kóp qajet etetin daqyldar úlesi azaitylady. Bul týraly Úkimet otyrysynda QR Aýyl sharýashylyǵy ministri Saparhan Omarov málim etti, dep habarlaidy QazAqparat.
«Aýyl sharýashylyǵy eńbekkerlerin zamanaýi ylǵal únemdeý tehnologiialaryn qoldanýǵa kóshýge yntalandyrý maqsatynda Ministrlik jabdyqtar satyp alýǵa, sondai-aq barlyq qajetti infraqurylymdy júrgizýge jumsalǵan shyǵyndardyń 50%-yn óteýdi kózdeitin investitsiialyq sýbsidiialaý túrindegi memlekettik qoldaýdy júzege asyrady.
Fermerlerdi oqytý jáne bilimin jetildirý júzege asyrylýda, onyń ishinde bul demonstratsiialyq fermalar jelisi arqyly da júrgizilýde. Jańa Sý resýrstaryn basqarýdyń 2030 jylǵa deiingi memlekettik baǵdarlamasynyń jobasynda sý únemdeý tehnologiialary qoldanylatyn alańdy 750 myń gektarǵa deiin jetkizý jónindegi indikator kózdelgenin atap ótken jón», - dedi ministr.
Sýarýdyń sý únemdeý tehnologiialaryn tolyq kólemde engizý sý shyǵynyn azaityp, ónimdilikti arttyra otyryp, sýarmaly jerlerdi utymdy paidalanýǵa múmkindik beredi.
«Sýarmaly jerlerdiń alańyn 3 mln gektarǵa deiin jetkizý qajettiligin eskere otyryp, ministrlik 2018 jyly egis alqaptarynyń boljamdy qurylymyn ázirledi. Bul qurylym oblystar ákimdikterine iske asyrý úshin joldandy. Kórsetilgen aýyl sharýashylyǵy daqyldary egisiniń boljamdy qurylymynda kúrish siiaqty sýdy kóp qajet etetin daqyldar úlesiniń 75 myń gektarǵa deiin jáne maqta daqyldary úlesiniń 100 myń gektarǵa deiin azaiýy eskerilgen. Sondai-aq, 2030 jyly egis qurylymynda masaqty dándi daqyldardy 50 myń gektarǵa deiin kemitý josparlanýda, bul rette soltústik óńirde dándi daqyldardy azyqtyq aýyspaly egiste sýarý kózdelgen.
Egis qurylymy ońtaily sýarmaly jerlerdiń kórsetilgen alańyn durys paidalaný Memleket basshysynyń joǵary rentabeldi daqyldar óndirisine kóshý, importty almastyrý jáne sýarmaly jerler alańyn 2030 jylǵa deiin birtindep 3 mln gekterǵa deiin jetkizý boiynsha qoiǵan mindetterin oryndaýǵa múmkindik beredi», - dedi S. Omarov.
