2030 jylǵa deiingi tujyrymdama boiynsha zeinetaqy júiesin qandai ózgerister kútip tur? Senatorlardyń bul suraǵyna Úkimet basshysy Asqar Mamin resmi túrde jaýap berdi, dep habarlaidy "Ult aqparat".
Aita ketsek buǵan deiin senatorlar Úkimet basshysyna depýtattyq saýal joldap, 2030 jylǵa deiin zeinetaqy júiesin jańǵyrtý tujyrymdasynyń jobasyn synǵa alǵan edi. Olardyń aitýynsha aty dardai bolsa da, bul tujyrymdamada eshqandai jańalyq joq. Esesine, buǵan deiin berilip kelgen bazalyq zeinetaqy tólemin, eń tómengi zeinetaqy men jinaqtalǵan zeinetaqynyń saqtalýyn qamtamasyz etetin memlekettik kepildemeni biriktirip, bir ǵana kepildendirilgen tómengi zeinetaqy degen uǵym engizilgeli otyr. Bul jerde de aýyldaǵy zeinetkerler sol eń tómengi zeinetaqyǵa táýeldi bolaiyn dep tur. Bul saýalǵa jaýap bergen Úkimet basshysy búgingi tańda jinaqtaýshy zeinetaqy júiesine qatysýshylardyń sany 11,2 mln adam ekenin, onyń ishinde aýyl azamattary 4,7 mln adam ekenin habarlaidy. Biryńǵai jinaqtaýshy zeinetaqy qoryndaǵy zeinetaqy jinaqtarynyń somasy 12,2 tlrn teńgege jetken. Onyń 3,6 trln teńgesi aýyldaǵy halyqqa tiesili. Zeinetaqy tóleminiń ortasha mólsheri respýblika boiynsha 121 282 teńgeni (bazalyq – 29 520 teńge, yntymaqty – 64 538 teńge, jinaqtaýshy – 27 224 teńge), al aýyl turǵyndarynyń zeinetaqy tólemderiniń ortasha mólsheri 108 858 teńgeni quraidy.
«Zańǵa sáikes azamattarǵa zeinetaqy tólemin taǵaiyndaý kezinde eńbek ótili, eńbek kitapshasyndaǵy, aqparattyq júiedegi málimetter nemese arhiv derekteri negizinde esepke alynady. Mundai málimetter bolmaǵan jaǵdaida eńbek ótilin sot sheshimi negizinde rastaýǵa múmkindik bar. Qazirgi tańda zeinetaqy júiesin jańǵyrtýdyń 2030 jylǵa deiingi tujyrymdamasynyń ekinshi kezeńi iske asyrylýda. Onyń aiasynda bazalyq zeinetaqyny 2030 jyldan bastap eń tómengi kepildik berilgen zeinetaqyǵa ainaldyrý qarastyrylǵan», - deidi Asqar Mamin.
Premer-ministr atap aitqanda, bazalyq zeinetaqynyń eń tómengi mólsherin eń tómengi kúnkóris deńgeii kóleminiń 54 paiyzynan 70 paiyzyna deiin arttyrý, zeinetaqy júiesine qatysý ótiliniń 5 jyldan keiingi árbir jyly úshin tólem mólsherin 2 paiyzǵa ulǵaitý (bul qazirgi kezdegiden 10 paiyzǵa artyq), sondai-aq mólsherdiń eń joǵary shekteýin alyp tastaý kózdelip otyrǵanyn aitady.
«Bul sharalar zeinetaqymen qamsyzdandyrý, onyń ishinde tabysy tómen azamattardyń ómir súrý deńgeiin kóterýge múmkindik beredi», - dep sendiredi Asqar Mamin.
