2026 jyldyń qańtar-sáýir ailarynda jasandy intellekt (AI) servisteriniń atyn jamylǵan ziiandy baǵdarlamalar arqyly shaǵyn jáne orta bizneske jasalǵan kibershabýyldar sany ótken jyldyń osy kezeńimen salystyrǵanda shamamen bes ese artty. Bul týraly «Kasperskii zerthanasy» habarlady, dep jazady ult.kz.
Kompaniia málimetinshe, osy tórt ai ishinde álem boiynsha shaǵyn jáne orta bizneske baǵyttalǵan 33 myńnan astam shabýyl tirkelgen. Qaskóiler kóbine ChatGPT, Claude jáne DeepSeek siiaqty tanymal AI servisteriniń ataýyn paidalanyp, ziiandy baǵdarlamalardy taratqan. Anyqtalǵan shabýyldardyń 42 paiyzy ChatGPT, 24 paiyzy Claude, al 20 paiyzy DeepSeek ataýymen bailanysty bolǵan.
Mamandardyń aitýynsha, mundai shabýyldarda negizinen troiandyq baǵdarlamalar qoldanylady. Olar qurylǵyǵa jasyryn enip, qosymsha ziiandy kodtardy júktei alady, sondai-aq paidalanýshylardyń derekterin urlaý, ózgertý nemese joiý qaýpin týdyrady.
Budan bólek, kiberqylmyskerler Telegram, WhatsApp jáne Zoom sekildi keń taralǵan servisterdiń atyn jamylyp ta ziiandy baǵdarlamalar taratyp jatyr. Osy jyldyń alǵashqy tórt aiynda «Kasperskii zerthanasynyń» sheshimderi osyndai 415 myńǵa jýyq shabýyldy buǵattaǵan.
Kompaniianyń kiberqaýipsizdik jónindegi sarapshysy Vasilii Kolesnikovtyń aitýynsha, qyzmetkerlerdiń jasandy intellekt quraldaryn kúndelikti jumysta jii qoldanýy alaiaqtarǵa jańa múmkindik ashyp otyr. Sondyqtan baǵdarlamalardy tek resmi kózderden júktep, sait mekenjailaryn muqiiat tekserý jáne senimdi qorǵanys sheshimderin paidalaný mańyzdy.
Sarapshylar bizneske kiberqaýipterden qorǵaný úshin aqparattyq qaýipsizdik júielerin jańartyp, elektrondyq poshtany qorǵaý quraldaryn engizýdi, qyzmetkerlerge qaýipsizdik talaptaryn túsindirýdi jáne mańyzdy derekterdiń rezervtik kóshirmelerin turaqty jasap otyrýdy usynady.
Zertteý 2026 jyldyń qańtar-sáýir ailarynda «Kasperskii zerthanasynyń» shaǵyn jáne orta biznesti qorǵaýǵa arnalǵan sheshimderi arqyly jinalǵan anonimdendirilgen derekter negizinde júrgizilgen.
