Foto: Almaty ákimdigi
Ortalyq kommýnikatsiialar qyzmetiniń alańynda ótken brifingte Almaty qalasynyń ákimi Darhan Satybaldy megapolistegi kólik keptelisi máselesi qoǵamdyq kólikti júieli damytý arqyly sheshilip jatqanyn aitty, dep habarlaidy Ult.kz.
Ákimniń aitýynsha, kólik qozǵalysynyń shamadan tys júktemesi qalanyń ekologiialyq jaǵdaiyna tikelei áser etedi. Sondyqtan jeke avtokólikterge balama retinde qoǵamdyq kólikti damytýǵa basymdyq berilip otyr.
«Bul – kúrdeli másele. Keptelis ekologiiaǵa tikelei áser etedi, sebebi kólikter aýaǵa taraityn ziiandy zattardyń 60%-yn shyǵarady. Biz Shanhai, London jáne Máskeý sekildi qalalardyń tájiribesin zerdeledik. Máskeýde 2016 jyly jeke avtokólikti paidalanýshylardyń úlesi 60% bolsa, búginde bul kórsetkish 30%-ǵa deiin tómendedi, al qalǵan 70% turǵyn qoǵamdyq kólikti paidalanady. Sondyqtan keptelis máselesiniń bir ǵana sheshimi bar», – dedi Darhan Satybaldy.
Ákimniń aitýynsha, máseleni sheshýdiń tiimdi jolynyń biri – jyldam júretin qoǵamdyq kólik baǵyttaryn damytý.
«Birinshiden, BRT jelilerin tez ári salystyrmaly túrde ońai iske qosýǵa bolady. Sonymen qatar LRT jobasy da daiyndalyp jatyr, bul baǵyttar qatar júzege asyrylady», – dedi ol.
Qala basshysy metronyń damýyna da jeke toqtaldy. Onyń aitýynsha, qazirgi ýaqytta birqatar nysandardy aiaqtaý merzimderi qaita qaralyp jatyr.
«Maýsym aiynda metroǵa barǵanymda maǵan «Qalqaman» beketin aiaqtaýǵa 24 ai qajet delingen. Qazir bul jumystardy 8-9 aida bitirý josparlanyp otyr. Mundai jobalardy jedel júzege asyrý kerek», – dedi ákim.
Onyń aitýynsha, qala metropolitendi keńeitýdi jalǵastyryp jatyr.
«Kelesi jyly «Qalkaman» beketi men «Barlyq» bazary arasyndaǵy 5,3 shaqyrymdyq metro jelisiniń qurylysy bastalady. Sondai-aq «Jibek joly» beketinen áýejaiǵa deiingi 14 shaqyrymdy qamtityn ekinshi jeli jobasy ázirlenip jatyr», – dedi Darhan Satybaldy.
Sóz sońynda ákim metro men qoǵamdyq kólik damymai, qaladaǵy kólik keptelisi máselesin sheshý múmkin emes ekenin atap ótti.
