Foto: Úkimet
Parlament Májilisiniń jalpy otyrysynda qarjy ministri Mádi Takiev 2026-2028 jyldarǵa arnalǵan respýblikalyq biýdjet shyǵystarynyń negizgi parametrlerin qaraý kezinde Úkimet azamattardyń ómir súrý sapasy men ekonomikanyń ornyqty damýyna basymdyq bere otyryp, áleýmettik baǵdarlanǵan baǵytty jalǵastyratynyn atap ótti, dep habarlaidy Ult.kz.
Máselen, Qarjy ministrliginiń málimetinshe, densaýlyq saqtaý salasyna 2,7 trln teńge qarastyrylǵan. Biylmen salystyrǵanda bul qarajat 107 mlrd teńgege artyq. Bul meditsinalyq qyzmetterdiń qoljetimdiligin arttyrýǵa múmkindik beredi.
Bilim jáne ǵylym salasyna 901,7 mlrd teńge josparlanýda. Bilim berý protsesiniń sapasyn jaqsartý, daryndy jastardy qoldaý jáne ǵylymi ortalyqtardy damytý boiynsha basymdyqtar saqtalýda.
2026 jyly mádeniet, týrizm jáne sportty damytýǵa 263,5 mlrd teńge qarastyrylǵan. Memleket basshysynyń turaqty ekonomikalyq ósýdi qamtamasyz etý jónindegi tapsyrmasyn oryndaý maqsatynda memlekettik qoldaý sharalaryna keshendi taldaý júrgizildi.
2026 jyly ekonomikany yntalandyrýǵa shamamen 1,2 trln teńge josparlanýda, al naqty sektordy damytýǵa jumsalatyn qarajattyń jalpy kólemi 540 mlrd teńgege artyp, 3,7 trln teńgeni quraidy. Bul sharalar jańa salalyq ósý draiverlerin iske qosýǵa jáne eldiń investitsiialyq áleýetin nyǵaitýǵa múmkindik beredi.
Negizgi basymdyqtardyń biri óńirlerdi damytý bolyp qala beredi. Óńirlerdi damytýǵa 2026-2028 jyldarǵa 581 mlrd teńge qarastyrylǵan, onyń ishinde 2026 jyly – 300 mlrd teńge. Bul jobalar asa mańyzdy jáne jalpyhalyqtyq mańyzǵa ie. Ákimdikterdiń derbestigin arttyrý maqsatynda 2026 jyly óńirlerge transfertter arqyly 5,1 trln teńge baǵyttalady.
Kúshtik qurylym blogyna 2026 jyly 3 trln teńge bólinedi, bul biylmen salystyrǵanda 335 mlrd teńgege artyq. Osylaisha, 2026 jyly qorǵanys shyǵyndary JIÓ-niń 1%-yn quraidy.
Qarajat tek jaýyngerlik daiyndyqty qoldaýǵa ǵana emes, sonymen qatar júielik innovatsiialardy iske asyrýǵa da jumsalady.
