Foto: Úkimet
Premer-ministrdiń orynbasary – ulttyq ekonomika ministri Serik Jumanǵarin Saýda jáne integratsiia ministrliginiń keńeitilgen alqa otyrysyn ashty. Jiynda 2025 jyldyń qorytyndylary shyǵarylyp, 2026 jylǵa arnalǵan negizgi mindetter aiqyndaldy, dep habarlaidy Ult.kz.
Ótken jyldyń qorytyndysy boiynsha saýda salasy elimizdiń jalpy ekonomikalyq ósiminiń 26%-yn qamtamasyz etip, ekonomikanyń negizgi qozǵaýshy kúshteriniń biri ekenin taǵy bir márte dáleldedi. Ishki taýar ainalymy 80 trln teńgege jetti. Salaǵa 1,3 trln teńge kóleminde investitsiia tartyldy. Shikizattyq emes eksport $41 mlrd qurady. Qyzmetter eksporty 3,7%-ǵa ósip, $12,3 mlrd-qa jetti.
Serik Jumanǵarinniń aitýynsha, saýda óndiris, biznes jáne tutynýshy arasyndaǵy ózara bailanysty qamtamasyz etip, ekonomikanyń turaqty damýyna berik negiz qalaidy.
"Bizdiń mindetimiz – qol jetkizilgen qarqyndy saqtap qana qoimai, saýda júiesin tiimdilik pen básekege qabilettiliktiń jańa sapaly deńgeiine kóterý. Ministrlik retteýshi organ rólinen belsendi damý draiverine ainalýy tiis. Bul úshin kóterme jáne bólshek saýda ainalymyn ulǵaitý, ishki naryqty otandyq taýarlarmen tolyqtyrý, áleýmettik mańyzy bar ónimderdiń turaqty jetkizilýin qamtamasyz etý, “óndirýshiden – sórege deiingi” tizbekti qysqartý, eksport kólemin arttyrý jáne saýdany kóleńkeli ainalymnan júieli túrde shyǵarý qajet", — dep atap ótti vitse-premer.
Sonymen qatar eldiń uzaq merzimdi damýyna yqpal etetin qurylymdyq ózgerister men aýqymdy reformalardy túsindirý jumystarynyń mańyzdylyǵy da aityldy. Alqa otyrysyna qatysýshylar jańa Konstitýtsiiany qabyldaý jónindegi referendýmǵa belsendi qatysýǵa shaqyryldy.
Memleket basshysynyń infliatsiia deńgeiin ekonomikalyq turǵydan negizdelgen shekke deiin tómendetý jónindegi tapsyrmalaryn oryndaý maqsatynda Saýda jáne integratsiia ministrligi men Aýyl sharýashylyǵy ministrligine qysqa merzim ishinde ishki naryqty otandyq azyq-túlik taýarlarymen tolyq qamtý boiynsha naqty sharalar ázirleý mindeti júkteldi.
"Biyl ekonomikanyń naqty sektoryndaǵy jobalardy qarjylandyrý úshin “Báiterek” holdingin 1 trln teńgege kapitaldandyrý kózdelip otyr. Investitsiialyq tapsyrys aiasynda qazirgi ýaqytta edáýir kólemde importtalatyn taýarlar óndirisin keńeitýge baǵyttalǵan shamamen 1,5 myń jobadan turatyn aldyn ala tizim qalyptastyryldy. Onyń ishinde 500-den astamy agroónerkásiptik keshenge, 400-den astamy óńdeý ónerkásibine, qalǵany infraqurylym salasyna tiesili.
Saýda jáne integratsiia ministrliginiń negizgi mindeti – osy jobalar sheńberinde óndiriletin ónimniń kepildi satylymyn qamtamasyz etý. Bul – aýqymdy jumys, sondyqtan ony júzege asyrý tetikterin qazirden bastap naqtylaý qajet", — dep qorytyndylady vitse-premer.
Sondai-aq otandyq óndirýshilerdi qoldaý, birjalyq saýdany damytý, salalyq úderisterdi tsifrlandyrý jáne joǵary qosylǵan quny bar ónim eksportyn arttyrý baǵytyndaǵy mindetter de aiqyndaldy.
