2025 jylǵa qarai Qazaqstanda jańartylatyn energetikanyń úlesi 6 paiyzǵa jetedi. Bul týraly Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«Elektr energetikasyndaǵy jańa tehnologiialar energiia júiesin basqarýdyń, naryqqa qatysýshylardyń ózara qarym-qatynasynyń jańa qaǵidattaryn, sondai-aq uzaq merzimge egjei-tegjeili josparlaýdy qajet etedi. Elimizde jańartylatyn energetikany damytý sońǵy onjyldyqta elektr energetikasy salasyndaǵy tásilderdi qaita qaraýdy talap etip otyr. Memlekettik josparlaý júiesiniń qujattarynda mynadai naqty maqsattar qoiylǵan, atap aitqanda elektr energiiasyn óndirýdiń jalpy kólemindegi jańartylatyn energetikanyń úlesin 2025 jyly 6 paiyzǵa, 2030 jyly 10 paiyzǵa deiin jetkizý eskerilgen. Al 2050 jylǵa qarai jalpy energiia tutynýdyń keminde jartysy jańartylatyn jáne balamaly energiia kózderine tiesili bolýǵa tiis», - dedi ministr.
Onyń aitýynsha, Qazaqstannyń «jasyl» ekonomikaǵa kóshý tujyrymdamasynda 2020 jyl jańartylatyn energetika indikatoryn oryndaýdyń mejelik kezeńi boldy. 2020 jyldyń qorytyndysy boiynsha elektr energiiasyn óndirýdiń jalpy kólemindegi jańartylatyn energetikanyń úsh paiyzdyq úlesi tolyq oryndaldy.
«Jańartylatyn energetika salasynyń qalyptasý kezeńinde Úkimet barlyq qajetti jaǵdailardy jasady. Úzdik halyqaralyq tájiribeni eskere otyryp, 2013 jyly tirkelgen tarifter júiesi engizilip, jańartylatyn energiia kózderi elektr energiiasyn biryńǵai satyp alýshy quryldy. Elektrondyq aýktsionǵa kóshý júzege asyryldy. Tirkelgen tarifter tetigi jańartylatyn energetika damýynyń bastapqy kezeńinde osy sala naryǵyn jyldam iske qosyp, jel, kún energetikasynyń birqatar jobalaryn júzege asyrýǵa múmkindik berdi», - dedi N. Noǵaev.
Onyń sózine qaraǵanda, salanyń damýyna kórsetilgen qoldaýlardyń nátijesinde jańartylatyn energiia kólemi turaqty ósip keledi. Sońǵy 6 jylda jańartylatyn energetika nysandarynyń belgilengen qýaty shamamen 10 esege ulǵaiyp, 2014 jylǵy 178 MVt-tan 2020 jyly 1635 MVt-ty qurady.
