2025 jylǵa deiin básekelestikti damytý jónindegi ulttyq jobada memlekettiń qatysy bar barlyq avtobýs parkteri jekeshelendiriledi. Bul týraly Básekelestikti qorǵaý jáne damytý agenttiginiń tóraǵasy Serik Jumanǵarin aitty, dep habarlaidy QazAqparat.
«Munda qoljetimdi bolý jaǵdaiy óte mańyzdy. Konkýrs ótkizý kezinde jolaýshylar men júkti avtomobil kóligimen tasymaldaý erejeleri týraly baldyq baǵalaý shkalasy bar – bul memlekettik avtoparkterge artyqshylyq beretin konkýrstyq usynys. Merzimi neǵurlym tómen bolsa, soǵurlym kóp upai beriledi. Árine, jańartýdy eskersek, memlekettik avtoparkterdiń artyqshylyǵy bar», - dedi S. Jumanǵarin «Kazinform» alańynda «Qoǵamdyq kólikpen jolaýshylar tasymaldaýdaǵy básekelestik» atty jiynda.
Óndiristik, tehnikalyq bazanyń bolýy jóninde spiker jolaýshylardy tasymaldaý jaǵdaiyn jaqsartatyn qosymsha jaǵdailardyń óte mańyzdy ekenin jetkizdi.
«Otandyq óndiristen shyqqan mikroavtobýstar bolsa – árbir danasy úshin 5 ball, jeke menshiktegi mikroavtobýstar bolsa – árqaisysyna 5 ball. Lizing úshin – ár danasyna 1 ball. Bul kelisim kem degende úsh jylǵa jasalady. Park jańartylǵan jaǵdaida 10 jylǵa deiin uzartylady. Jaǵdaidyń túzelip kele jatqany túsinikti. Memlekettiń tasymaldaý ekonomikasyna qatysýy jyldan-jylǵa artyp keledi», - dedi Agenttik tóraǵasy.
Onyń aitýynsha, Básekelestikti qorǵaý jáne damytý agenttigi «Open Space» jáne «Kedergi boiynsha keńester» atty ashyq alańdar qurǵan. Kedergiler jónindegi keńesterde bul máselelerge erekshe nazar aýdarylady.
«Tasymaldaý marshrýtyna qyzmet kórsetý quqyǵyna konkýrs ótkizý merzimderi reglamenttelmegen. Eger bireý marshrýttan bas tartsa, ketip qalsa, árine, konkýrs ótkizý merzimderin belgileý qajet. Konkýrs kóbinese tiimdi jáne tiimsiz marshrýttar qosylǵan birneshe marshrýttardan turatyn bir lotqa ótkiziledi. Erejege sáikes, tiimdi marshrýt tiimsizben birikse de, olar áleýmettik mańyzdy bolýy kerek. Taǵy bir másele – birqatar óńirlerde sýbsidiialardyń bolmaýy. Buǵan deiin aitqanymdai, ne biýdjettik ótinimderdi sapaly daiyndaý kerek nemese tasymaldaýǵa ádiletti bolatyn tarif berý qajet. Bekitilgen tarifke bailanysty biznes shyǵynǵa ushyrap otyr. Kóptegen adamdar keibir qashyqtyqta jolaýshylar aǵyny tómendegenin, sol úshin QQS alyp tastaýdy, avtobýs satyp alý kezindegi ýtilizatsiia aqysyn alyp tastaý keregin aityp júr. Infraqurylymnyń bolmaýy: janarmai quiý, gaz, elektrlik qýattaý, avtobýs turaǵy, avtobýstyń kirýine arnalǵan arnaiy oryndardyń bolmaýy da – mańyzdy másele. Eń bastysy – memleket qatysatyn avtobýstardyń úlesi joǵary bolyp otyr. Biz osy baǵytta jumys júrgizemiz jáne 2025 jylǵa deiin básekelestikti damytý jónindegi ulttyq jobada memleket qatysatyn barlyq avtobýs parkteri jekeshelendiriledi dep josparlap otyrmyz. Tiisinshe, memlekettik jáne kvazimemlekettik parkterge arnalǵan qyzmet túri bolmaidy. Árine, bul básekelestikti damytý dárejesin eskere otyryp jasalady. Básekelestik áli damymaǵan aýdandyq nemese aýyldyq deńgeide áli júrgizilmeýi múmkin», - deidi Jumanǵarin.
