Kezdesý barysynda Qazaqstannyń qurylys jáne turǵyn úi salasyn damytý perspektivalary qarastyryldy. Indýstriia jáne infraqurylymdyq damý ministrliginiń aldyn ala boljamy boiynsha, 2022-2025 jyldar aralyǵynda Qazaqstanda 62 million sharshy metr turǵyn úi salynady dep kútiledi.
Sonymen qatar, 5 201 memlekettik nysannyń qurylysy júrgizilip jatyr, onyń 2 137-si memleket qarajaty esebinen salynady. Qazirgi kezde 286 nysannyń qurylysy toqtatyldy. 84 nysanda jumystardyń toqtaýyna baǵanyń qymbattaýy sebep bolsa, 202 qurylys basqa da sebepter boiynsha (aýa raiyna, maýsymdyq shekteýler jáne t.b. bailanysty) toqtatyldy.
QR Indýstriia jáne infraqurylymdyq damý ministri Qaiyrbek Óskenbaevtyń aitýynsha, árbir nysan boiynsha jaǵdai saraptalyp, jumystardy qaita bastaý múmkindigi qarastyrylyp jatyr.
QR Premer-ministri nysandardy salýǵa ótkiziletin memlekettik konkýrstardyń josyqsyz uiymdastyrýshylaryn jaýapqa tartý boiynsha sharalar qabyldaýdy tapsyrdy.
"Biýdjettik qarjylandyrýsyz qurylystarǵa konkýrstar jariialanady. Bul - zań tártibin buzý. Kináli tulǵalardy tiisti jaýapqa tartýdy qarastyrý qajet", - dedi Álihan Smaiylov.
Sondai-aq memlekettik qurylysqa jumsalatyn shyǵyndardy azaitý maqsatynda Premer-ministr Indýstriia jáne infraqurylymdyq damý ministrligine múddeli memlekettik organdarmen jáne uiymdarmen birlesip, jobalaý-smetalyq qujattama qunyna baǵa belgilenýine taldaý júrgizýdi tapsyrdy.
