2024 jyly respýblikalyq biýdjet kirisi 50 paiyzǵa artady. Bul týraly Senattyń jalpy otyrysynda QR Premer-Ministriniń birinshi orynbasary Álihan Smaiylov aitty, dep habarlaidy QazAqparat.
«Úkimet Memleket basshysynyń tapsyrmasymen 2030 jylǵa deiingi memlekettik qarjyny basqarýdyń jańa tujyrymdamasynyń jobasyn ázirledi. Onda salyq-biýdjet saiasaty, Ulttyq qor qarajatyn paidalaný saiasaty, memlekettik qaryz jáne basqa da máseleler kórinis tapqan. Memlekettik qaryzdy basqarý máselesi keshendi túrde sheshiledi. Biýdjettiń ózindik kirisi jalpy ishki ónim ósiminiń ataýly qarqynynan joǵary qarqynmen ósetin bolady. Máselen, respýblikalyq biýdjettiń ózindik kirisi 7,2 trln teńge bolsa, 2024 jyly ózindik kiris 10,4 trln teńge bolady. Iaǵni, ósim - 50 paiyzǵa jýyq», - dedi ol senatorlardyń saýalyna orai.
Onyń atap ótýinshe, salyqtyq-kedendik ákimshilendirýdi odan ary tsifrlandyrý, taýarlardy qadaǵalaýdyń ulttyq júiesin engizý jalǵasady.
Salyq zańnamasyna ózgertýler engizilip, halyqaralyq salyq salý, transferttik baǵa túzý, aktsiz saiasaty jetildiriledi.
«Sonymen qatar gaz-mettalýrgiia kesheni boiynsha da usynystarmen kelemiz. Munyń barlyǵy Ulttyq qor qarajatyn paidalanýdy qazirgi 4,5 trln teńgeden 2024 jylǵa qarai 2,4 trln teńgege deiin, iaǵni 2 esege qysqartýǵa múmkindik beredi», - dedi Álihan Smaiylov.
