Elimizdiń tehnikalyq jáne kásiptik bilim berý uiymdarynda qujattardy qabyldaý bastaldy. Jańa oqý jylynda memlekettik bilim berý tapsyrysy boiynsha 145 myń abitýrient qabyldanady dep josparlanyp otyr. Bul ótken jylmen salystyrǵanda, 10 myń adamǵa kóp, dep habarlady QR Oqý-aǵartý ministrligi.
Memlekettik bilim berý tapsyrysy tehnikalyq, iaǵni geologiia, mashina qurastyrý, energetika, IT, metallýrgiia, kólik jáne t.b. mamandyqtar boiynsha kóbeitildi. Sonymen qatar, biyl úshinshi jyl qatarynan kolledj abitýrientterdi jumysqa ornalastyrý mindettemesimen kásiporyndardyń ótinimderi boiynsha qabyldap jatyr. Bul jyl saiyn eńbek naryǵynyń suranysyna sai mamandyqtarǵa 10 myń stýdentti qabyldaýǵa múmkindik beredi.
Sondai-aq osy jyldan bastap kolledjge kvota tizimi keńeitilip, arttyrylady:
- I nemese II toptaǵy múgedektigi bar adamdar, bala kezinen múgedektigi bar adamdar, múgedektigi bar balalar arasynan shyqqan azamattar úshin;
- bala kezinen múgedektigi bar balalardy, I nemese II toptaǵy múgedektigi bar adamdardy tárbielep otyrǵan otbasylardaǵy balalar úshin;
- áskerge shaqyrý boiynsha merzimdi áskeri qyzmettiń belgilengen merzimin ótkergen Qazaqstan Respýblikasynyń azamattary úshin.
Esterińizge sala keteiik, abitýrientter ótinishti kolledjge qaǵaz túrinde jáne egov.kz portaly arqyly elektrondy túrde eki jolmen bere alady.
Kolledjge túsý úshin 9-synyp túlekteri 25 maýsym men 18 tamyz, 11-synyp túlekteri 25 maýsym men 20 tamyz aralyǵynda qujat tapsyra alady.
