Ortalyq kommýnikatsiialar qyzmeti alańynda ótken onlain brifingte QR Densaýlyq saqtaý ministri Aleksei Tsoi ótemaqy alatyn meditsinalyq qyzmetkerlerdiń qatary ne sebepti artpaitynyn aitty, dep habarlaidy QazAqparat.
«Biz árbir meditsinalyq qyzmetkerge ótemaqy bergimiz keledi, biraq myna mańyzdy máseleni eskerýimiz kerek: dáriger qabyldaýynda bolatyn ár naýqas koronavirýs infektsiiasymen aýyrmaidy. Eger dáriger infektsiialyq statsionarda jumys isteitin bolsa – bul jerde dárigerge tónetin qaýip, táýekel deńgeii múldem basqa. Mysaly, dáriger ota jasap jatqan naýqas gepatit nemese JITS-pen aýyrýy múmkin. Bul da dáriger úshin qaýipti. Barlyq dáriger Gippokrat antyn berý arqyly naýqastyń ómiri úshin kúresip, táýekel etýge daiyn bolady. Jalpy alǵanda, Úkimettiń, Memleket basshysynyń qoldaýymen meditsinalyq qyzmetkerler eńbegine laiyqty jalaqy alýǵa qol jetkizdik. 2023 jyly meditsinalyq qyzmetkerlerdiń jalaqysy 2 ese ósýi múmkin», - deidi QR Densaýlyq saqtaý ministri Aleksei Tsoi.
Onyń aitýynsha, Qazaqstanda jasalǵan ókpeni jasandy jeldetý apparatynyń kepildik merzimi – 3 jyl.
«Meditsinalyq qurylǵylarǵa qatysty zańnamalyq deńgeide bekitilgen talaptar bar. Qazaqstanda jasalǵan ókpeni jasandy jeldetý apparattary elimizdegi statsonarlarda synaqtan ótti. Ol naýqastarǵa qoldanýǵa jaramsyz jáne aqaý bolyp jatqan jaǵdaida óndirýshige qaitarylady. Juqpaly aýrýy bar adamdardy qabyldaityn árbir aýrýhanada ókpeni jasandy jeldetý apparaty kem degende 15% bolýy kerek degen usynys aittyq. Bul normativterdi oryndaý óte mańyzdy. Qazirgi ýaqytta osyndai qurylǵylar qosymsha satyp alynyp, aimaqtarǵa jetkizilýde», - deidi ol.
