Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin shaǵyn aýyldardy internetpen qamtamasyz etý qalai iske asatynyn aitty, dep habarlaidy "Ult aqparat".
Halyq aldyndaǵy eseptik kezdesýin qorytyndylaǵan Baǵdat Mýsin ortalyq kommýnikatsiialar qyzmetinde ótken brifingte 2023 jylǵa deiin ǵalamtorsyz otyrǵan 1200 aýyldyń teń jartysy zamanaýi igilikke qol jetkizetinin aitty.
«6459 aýyldyń 5300-i internetke qosylǵan. Biraq sonyń 510-ynda internet sapasy óte tómen. Bul aýyldardyń árqaisysyn anyqtadyq. Endi telekom-operatorlarmen jumys istep jatyrmyz. Bizde jospar, olarda osyǵan arnalǵan aqsha bar. Byltyr zańnamaǵa túzetý engizip, radiojiilikti paidalanǵany úshin tólenetin investitsiianyń 90 paiyzyn aýyldyq jerlerde internet jelisin damytýǵa baǵyttaý jolǵa qoiylǵan bolatyn», - deidi Baǵdat Mýsin.
Ministr áli de bolsa 1200-ge jýyq aýylda eshqandai internet joq ekenin eske saldy. Ony sheshý úshin Starlink, One Web, SES siiaqty sheteldik kompaniialarmen memandým aiasynda pilottyq jobalar iske asyrylmaq.
«Ol aýyldardyń máselesin eki jolmen sheshemiz. Birinshi joly – radiojiilikter arqyly bolady. Ekinshi joly – tómen orbitaly jerserik toptary arqyly internet jetkizý. 2022 jyldyń aiaǵyna deiin interneti nashar 510 eldi mekendegi jaǵdaidy túzeimiz. Al internet múlde joq 1200 eldi mekenniń teń jartysyna tómen orbitaly jerserik toptary arqyly bailanys jetkiziledi», - dedi ol.
