2022 jyldan bastap elimizde birikken áleýmettik tólem engizilýi múmkin. Bul jaiynda Májilis depýtattarynyń saýalyna orai QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Qazirgi ýaqytta Eńbekaqy tóleý qoryna (ETQ) túsetin júkteme nominaldy mánde 31 paiyzdy quraidy. Ekonomikalyq yntymaqtastyq jáne damý uiymy elderinde jáne Qazaqstanda ETQ-ǵa tiimdi júkteme boiynsha júrgizilgen salystyrmaly taldaý Qazaqstandaǵy tiimdi mólsherleme 25,5 paiyzdy quraitynyn kórsetti. Bul EYDU elderindegi júktemeniń ortasha máninen 10 paiyzǵa tómen», - dedi Úkimet basshysy.
Osy rette Asqar Mamin QR Prezidentiniń 2019 jylǵy 2 qyrkúiektegi Joldaýyna sáikes Úkimetke áleýmettik jáne zeinetaqy júieleriniń turaqtylyǵy arasyndaǵy teńgerimdi qamtamasyz etý, sondai-aq biznestiń damýyn yntalandyrýdy saqtaý úshin biznestiń áleýmettik aýdarymdaryn jinaý kólemi men tetikteri boiynsha shoǵyrlandyrylǵan sheshim ázirleýge tapsyrma berilgenin atap ótti.
«Osy maqsatta 2022 jyldan bastap áleýmettik salyqty, Memlekettik áleýmettik saqtandyrý qoryna, Áleýmettik meditsinalyq saqtandyrý qoryna jarnalardy jáne jumys berýshilerdiń mindetti zeinetaqy jarnalaryn qamtityn birikken áleýmettik tólemdi engizý týraly usynys qaralýda. Jeke tabys salyǵyn jáne mindetti zeinetaqy jarnalaryn esepteýdi jáne tóleýdi ózgerissiz qaldyrý usynylady. Jeke tabys salyǵyn, mindetti zeinetaqy jarnalaryn jáne birikken áleýmettik tólemdi tóleý «Azamattarǵa arnalǵan úkimet» KEAQ-da biryńǵai tólem qujatymen júrgiziletin bolady. Osylaisha, usynylyp otyrǵan birikken áleýmettik tólemdi engizý ETQ-dan túsetin salyq pen tólemderdi esepteýdi edáýir jeńildetedi. Óitkeni jarnalardy esepteý kezinde qoldanylatyn ártúrli shegerimder alyp tastalady», - dedi Premer-Ministr.
