2021 jyly Memleket basshysynyń tapsyrmalaryn oryndaýǵa 1,6 trln teńge qarastyrylyp otyr. Bul týraly QR Premer-Ministriniń birinshi orynbasary Álihan Smaiylov aitty, dep habarlaidy QazAqparat.
«Prezidenttiń Joldaýda bergen tapsyrmalaryn oryndaý tiisti qarjyny qajet etedi. Biylǵy respýblikalyq biýdjette tiisti qarjy qarastyrylǵan. Mysaly, tez salynatyn 13 jańa infektsiialyq aýrýhanaǵa 30 mlrd teńge eskerilgen. Úkimet rezervinen tabysy az otbasylardyń balalary úshin kompiýterlik tehnikany satyp alýǵa 70 mlrd teńge bólindi. Qazirgi kezde 2020 jylǵy biýdjetti naqtylaý aiasynda qosymshy shyǵystardy qamtamasyz etý boiynsha jumystar júrgizilýde», - dedi ol Úkimet úiindegi ótken baspasóz máslihatynda.
Osy oraida meditsina qyzmetkerlerine qosymsha ústemaqy, dári-dármek satyp alý men basqa da qajettilikter qamtylǵan. Aldyn ala esepteýler boiynsha biylǵa qosymsha qajettilik shamamen 300 mlrd teńgeni quraýy múmkin.
«2021 jyldyń biýdjetinde Joldaýdaǵy Prezident tapsyrmalaryn oryndaýǵa 1,6 trln teńge qarastyrylǵan. Birinshi kezekte meditsina qyzmetkerleriniń, muǵalimderdiń eńbekaqysyn kóterý, shaǵyn jáne orta biznestiń nesie boiynsha paiyzdyq stavkasyn sýbsidiialaý, respýblikalyq mańyzdaǵy joldardyń qurylysy, «Aýyl – El besigi» baǵdarlamasyna, sondai-aq basqa da baǵyttarǵa arnalǵan shyǵystar eskerilgen. Budan basqa tapsyrmalar turǵysynda memlekettik organdarmen shyǵystar kólemi naqtylanyp jatyr», - dedi QR Premer-Ministriniń birinshi orynbasary.
Onyń sózine qaraǵanda, tapsyrmalardy oryndaý aiasynda shyǵyndardy ońtailandyrý qarastyrylǵan. Sonymen qatar biýdjetke qosymsha túsimder kóleńkeli ekonomikany tómendetý boiynsha jumystardan qamtamasyz etiledi.
