Ótken jyly Qazaqstan ekonomikasy jyly 4,1%-ǵa ósip, pandemiiaǵa deiingi deńgeige oraldy. Bul týraly QR Ulttyq bankiniń tóraǵasy Ǵalymjan Pirmatov aitty, dep habarlaidy QazAqparat.
Aita keteiik, Senatta «2021 jylǵy respýblikalyq biýdjetti oryndaý týraly» QR Úkimetiniń jáne respýblikalyq biýdjettiń atqarylýyn baqylaý jónindegi esep komitetiniń baiandamasy tyńdalyp jatyr.
«2021 jyly álemdik ekonomika pandemiiaǵa deiingi deńgeige qaita oraldy. Jahandyq jalpy ishki ónimniń ósýi 6,1%-dy qurap, 40 jyldan astam ýaqyt ishinde eń joǵarǵy kórsetkishke jetti. Qazaqstan ekonomikasy da 2021 jyly 4,1%-ǵa ósip, pandemiiaǵa deiingi deńgeige oraldy. Álemdik ekonomikanyń tez qalpyna kelýi shamadan tys suranysqa ákep soqtyrdy jáne shikizat, materialdar men azyq-túlik baǵasy qatty qymbattady. Bul energetikalyq daǵdaryspen birge álemniń kóptegen elderinde rekordtyq infliatsiiaǵa ákeldi», - dedi Pirmatov Senattyń jalpy otyrysynda.
Onyń aitýynsha, jappai vaktsinatsiia men shekteýlerdiń álsireýi, jahandyq iskerlik belsendiliktiń joǵarylaýy men daǵdarysqa qarsy aýqymdy sharalar júrgizý arqyly álemdik ekonomikanyń tez qalpyna kelýinen syrtqy infliatsiialyq qysym ósti.
Syrtqy faktorlarmen qatar jekelegen taýar naryǵyndaǵy ishki teńgerimsizdik eldegi infliatsiialyq qysymdy kúsheitti.
«2021 jyldyń birinshi jartysynda infliatsiialyq protsesterdiń turaqtanýyna qaramastan, jyldyń ortasynan bastap infliatsiia azyq-túlik, shikizat pen materialdar baǵasynyń jalpy álemdik trendiniń aiasynda jedeldei bastady. Jazǵy kezeńde kókónis naryǵyndaǵy teńgerimsizdik, janar-jaǵarmai jáne retteletin qyzmetter baǵasynyń ósýi – ishki proinfliatsiialyq triggerler boldy. Osy jaǵdaida Ulttyq bank Úkimetpen birlesip, Memleket basshysynyń tapsyrmasyna sáikes, infliatsiiany 8,5% sheginde ustap turý boiynsha sharalar qabyldady», - dedi Pirmatov.
