Kelesi jyly elordada kórsetiletin memlekettik qyzmet tolyqtai elektrondy túrge kóshpek. Bul týraly Nur-Sultan qalasy Jumyspen qamtý jáne áleýmettik qorǵaý basqarmasynyń basshysy Sáýle Nurǵojina málim etti, dep habarlaidy QazAqparat.
«Jyl basynan beri elordada 221 168 memlekettik qyzmet kórsetildi. Sonyń ishinde elektrondy túrde qyzmet kórsetý 83 paiyzǵa artyp otyr, ótken jyly bul kórsetkish 70 paiyzdy quraǵan bolatyn. Iaǵni 19 memlekettik qyzmettiń 14-i elektrondy túrde kórsetilýde. 2021 jyly elordada memlekettik qyzmetti 100 paiyz elektrondy túrde qoljetimdi etý maqsaty tur», - dedi Sáýle Nurǵojina Nur-Sultan qalalyq máslihatynyń otyrysynda jasaǵan baiandamasynda.
Onyń aitýynsha, búginde Nur-Sultanda 167 myń adam áleýmettik qoldaýǵa muqtaj.
«Olardyń qatarynda az qamtylǵan otbasylar, múgedek jandar, soǵys ardargerleri men zeinetkerler bar. Búginde atalǵan toptaǵy azamattarǵa qarjylai tólemaqy men tegin qyzmetter kórsetilip keledi. Sondai-aq memlekettik merekeler men aitýly kúnder qarsańynda elordalyq 130 myń áleýmettik qoldaýǵa muqtaj jan bir rettik qarjylai tólemaqy aldy. Odan bólek, 28 myń múgedek jandy áleýmettik qoldaý maqsatynda 3,4 mlrd teńge qarjy bólindi, onyń 82 paiyzy jergilikti biýdjetten qarastyryldy. Sonymen qatar 2020 jyly bas qalada 15,7 myń adam saýyqtyrý sharalarymen qamtyldy», - deidi ol.
Aita ketsek, búgin elordalyq máslihatta Nur-Sultan qalasyndaǵy halyqtyń áleýmettik osal toptaryn (az qamtylǵan otbasylar, múgedekter, kópbalaly otbasylar, jetim balalar) qoldaý jáne ońaltýǵa arnalǵan sharalar qaraldy.
